بلوچستان میں امن و امان کی صورتحال تشویشناک، عوام غیر محفوظ ہیں، جنید اکبر

کوئٹہ: پاکستان تحریک انصاف کے رہنما جنید اکبر نے بلوچستان کی موجودہ امن و امان کی صورتحال پر گہرے دکھ اور افسوس کا اظہار کرتے ہوئے کہا ہے کہ صوبے میں عوام خود کو غیر محفوظ محسوس کر رہے ہیں۔ انہوں نے کہا کہ بلوچستان کے تمام مسائل کا پائیدار حل قانون کی بالادستی، آئین کی حکمرانی اور حقیقی جمہوریت کے قیام میں ہے۔

انہوں نے کہا کہ بلوچستان کا اقتدار ایسے عوامی نمائندوں کے پاس ہونا چاہیے جن پر صوبے کے عوام کو اعتماد ہو۔ جنید اکبر کا کہنا تھا کہ عمران خان پر پورے ملک کے عوام کا اعتماد ہے اور عوامی رائے کا احترام ہی ملک میں استحکام لا سکتا ہے۔

اس موقع پر سابق اسپیکر قومی اسمبلی اور پاکستان تحریک انصاف کے رہنما اسد قیصر نے کہا کہ ان کی سردار اختر جان مینگل سے ملاقات ہوئی ہے اور وہ ان کے اتحادی ہیں، جنہیں ساتھ لے کر چلیں گے۔ انہوں نے کہا کہ پاکستان تحریک انصاف کے دورِ حکومت میں چار سو سے زائد لاپتہ افراد کو بازیاب کرایا گیا تھا۔

اسد قیصر نے مزید کہا کہ بلوچستان کی محرومیوں کے خاتمے کے لیے ضروری ہے کہ عوام کی آواز سنی جائے اور ان کے مسائل کو سنجیدگی سے حل کیا جائے۔