بلوچستان ہائی کورٹ کا جوائنٹ روڈ پر نئی کمرشل سرگرمیوں کے خلاف بڑا عبوری حکم، ریلوے کا اشتہار معطل

کوئٹہ: بلوچستان ہائی کورٹ نے جوائنٹ روڈ پر نئی کمرشل سرگرمیوں اور تعمیرات کے خلاف اہم عبوری حکم جاری کرتے ہوئے پاکستان ریلوے کی جانب سے جاری متنازع اشتہار کو معطل کر دیا ہے۔ چیف جسٹس بلوچستان ہائی کورٹ جسٹس محمد کامران خان ملاخیل کی سربراہی میں دو رکنی بینچ نے سماعت کے دوران آئندہ حکم تک جوائنٹ روڈ پر کسی بھی نئی دکان، شاپنگ پلازہ، ہوٹل، مارکیٹ یا دیگر کمرشل منصوبے کی اجازت نہ دینے کا حکم دیا۔

عدالت نے پاکستان ریلوے، ضلعی انتظامیہ اور دیگر متعلقہ اداروں کو نوٹس جاری کرتے ہوئے ڈی ایس پاکستان ریلوے کو ذاتی حیثیت میں طلب کر لیا، جبکہ ڈپٹی کمشنر کوئٹہ کو غیر قانونی کمرشل سرگرمیوں اور تعمیرات کے حوالے سے تفصیلی رپورٹ پیش کرنے کی ہدایت کی۔

سماعت کے دوران عدالت نے جوائنٹ روڈ پر ٹریفک مسائل، تجاوزات اور 2016 کے عدالتی فیصلے کی خلاف ورزی پر ریلوے حکام کے اقدامات پر سخت برہمی کا اظہار کیا۔ عدالت نے واضح کیا کہ جوائنٹ روڈ، زرغون روڈ اور سمنگلی روڈ پر کمرشل سرگرمیوں سے متعلق سابقہ عدالتی احکامات بدستور برقرار رہیں گے اور سڑکوں کی توسیع کے منصوبوں کو کسی صورت متاثر نہیں ہونے دیا جائے گا۔

عدالت نے غیر قانونی تعمیرات اور ٹریفک جام کے مسئلے کو سنگین قرار دیتے ہوئے کہا کہ عوامی مفاد اور ٹریفک کی روانی ہر صورت یقینی بنائی جائے۔ سماعت کے دوران یہ بھی بتایا گیا کہ ضلعی انتظامیہ نے مختلف علاقوں میں متعدد غیر قانونی دکانیں سیل کی ہیں۔

بلوچستان ہائی کورٹ نے کیس کو 2016 کے تاریخی تجاوزات کیس کے ساتھ منسلک کرنے کی ہدایت دیتے ہوئے متعلقہ حکام سے مکمل تعمیل رپورٹ طلب کر لی۔ شہریوں کی جانب سے دائر آئینی درخواست پر آئندہ سماعت تک جوائنٹ روڈ پر نئی کمرشل لیزنگ اور تعمیراتی سرگرمیاں معطل رہیں گی۔