خضدار میں اے ٹی ایف ٹیم پر مسلح حملہ، ایس ایچ او سمیت دو اہلکار زخمی

خضدار: ضلع خضدار کے علاقے کرخ میں گزشتہ شب نامعلوم مسلح افراد نے انسداد دہشت گردی فورس (اے ٹی ایف) کی ٹیم پر حملہ کر دیا، جس کے نتیجے میں ایس ایچ او سمیت دو اہلکار زخمی ہوگئے۔

سرکاری ذرائع کے مطابق حملے کے بعد سیکیورٹی اہلکاروں اور حملہ آوروں کے درمیان شدید فائرنگ کا تبادلہ ہوا۔ حکام کا کہنا ہے کہ جوابی کارروائی کے دوران حملہ آوروں کے زخمی ہونے کے شواہد، جن میں خون کے نشانات بھی شامل ہیں، موقع سے ملے ہیں۔

ذرائع کے مطابق حملہ آور اپنے زخمی ساتھیوں کو ساتھ لے کر فرار ہونے میں کامیاب ہوگئے، جبکہ زخمی اہلکاروں کو فوری طور پر قریبی ہسپتال منتقل کر دیا گیا۔

واقعے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے، جبکہ حملہ آوروں کی تلاش جاری ہے۔