کوئٹہ میں گیس، بجلی اور پٹرول بحران، عوام پریشان

صوبائی دارالحکومت کوئٹہ میں گیس کی عدم فراہمی، بجلی کی غیر اعلانیہ لوڈشیڈنگ اور پٹرول کی قلت نے شہریوں کی مشکلات میں کئی گنا اضافہ کر دیا ہے۔ شہریوں کا کہنا ہے کہ شدید گرمی کے موسم میں بجلی کی طویل بندش نے معمولات زندگی بری طرح متاثر کر دیے ہیں جبکہ گیس کی عدم دستیابی کے باعث گھریلو صارفین کو شدید پریشانی کا سامنا ہے۔

شہر کے مختلف علاقوں میں پٹرول کی عدم دستیابی یا محدود فراہمی کے باعث موٹر سائیکل سواروں اور گاڑی مالکان کو طویل قطاروں میں انتظار کرنا پڑ رہا ہے۔ شہریوں کا کہنا ہے کہ ایک طرف بجلی کی غیر اعلانیہ لوڈشیڈنگ جاری ہے تو دوسری جانب گیس کی بندش اور پٹرول کی قلت نے زندگی اجیرن بنا دی ہے۔

عوامی حلقوں نے متعلقہ حکام سے مطالبہ کیا ہے کہ گیس، بجلی اور پٹرول کی فراہمی کو فوری طور پر یقینی بنایا جائے تاکہ شہریوں کو درپیش مشکلات کا خاتمہ ہو سکے۔ شہریوں نے خبردار کیا کہ اگر صورتحال میں بہتری نہ آئی تو احتجاج کا دائرہ وسیع کیا جا سکتا ہے۔