سماعت و گویائی سے محروم بیٹی نے والد کو لیور عطیہ کرکے تاریخ رقم کردی

گنداخہ:( نامہ نگار فریداحمد ) بلوچستان کے علاقے تحصیل گنداخہ کے گوٹھ چوکی جمالی سے تعلق رکھنے والی سماعت و گویائی سے محروم بیٹی دعا جمالی نے اپنے والد کو لیور عطیہ کرکے انسانیت، محبت اور قربانی کی ایک نئی مثال قائم کردی۔ پاکستان کی تاریخ میں پہلی مرتبہ ایک خصوصی خاتون ڈونر نے اپنے والد کی جان بچانے کے لیے لیور عطیہ کیا، جسے ایک تاریخی اور قابلِ فخر اقدام قرار دیا جا رہا ہے۔تفصیلات کے مطابق ممتاز قبائلی و سماجی شخصیت میر امان اللہ خان جمالی کے کزن منصور احمد جمالی کا گمب انسٹیٹیوٹ میں کامیاب لیور ٹرانسپلانٹ کیا گیا، جہاں ان کی بیٹی دعا جمالی نے اپنا لیور عطیہ کیا۔ کامیاب آپریشن کے بعد مریض کی صحت بہتر بتائی جا رہی ہے، جبکہ اس اقدام کو علاقے بھر میں بے حد سراہا جا رہا ہے۔اہلِ علاقہ، سماجی شخصیات اور مختلف مکاتبِ فکر سے تعلق رکھنے والے افراد نے دعا جمالی کے اس عظیم جذبے کو خراجِ تحسین پیش کرتے ہوئے کہا کہ بیٹی اللہ تعالیٰ کی عظیم نعمت ہوتی ہے، اور دعا جمالی نے اپنے والد کی جان بچا کر بہادری، ایثار اور والدین سے محبت کی لازوال مثال قائم کی ہے۔مقررین اور معززین نے کہا کہ دعا جمالی کا یہ اقدام نہ صرف بلوچستان بلکہ پورے پاکستان کے لیے باعثِ فخر ہے، جو انسان دوستی اور خاندانی محبت کا روشن پیغام دیتا ہے۔