حفاظتی ٹیکہ جات کے سلسلے میں سات روزہ خصوصی آگاہی مہم جاری

والدین محکمہ صحت کی جانب سے جاری مفت ویکسینیشن مہم میں بھرپور حصہ لیں۔ڈاکٹر ظفر اقبال وزیر

بنوں(نمائندہ خصوصی)گلوبل ٹائمز میڈیا یورپ کے مطابق بنوں میں چیپ آرگنائزیشن کے تعاون سے عالمی حفاظتی ٹیکہ جات کے سلسلے میں سات روزہ خصوصی آگاہی مہم جاری ہے۔محکمہ صحت اور چیپ آرگنائزیشن کی مشترکہ کاوشوں کے تحت مختلف علاقوں میں آگاہی مہم چلائی جا رہی ہے، جس کا مقصد ہر بچے تک رسائی کو یقینی بنانا ہے۔اس مہم کے حوالے سے ڈسٹرکٹ ہیلتھ آفیسر ڈاکٹر ظفر اقبال وزیر، ڈاکٹر وہاب خان اور طاہر رشید مروت نے والدین سے اپیل کی ہے کہ وہ محکمہ صحت خیبر پختونخوا کی جانب سے جاری مفت ویکسینیشن مہم میں بھرپور حصہ لیں۔ انہوں نے کہا کہ والدین نہ صرف اپنے بچوں کو حفاظتی ٹیکے لگوائیں بلکہ اپنے اردگرد کے دیگر بچوں کو بھی ویکسینیشن کے لیے راغب کریں اور حکومت کے ساتھ تعاون کریں۔انہوں نے مزید کہا کہ حفاظتی ٹیکہ جات بچوں کی صحت اور محفوظ مستقبل کے لیے نہایت اہم ہیں۔ ان ٹیکوں کے ذریعے خسرہ، تپ دق (ٹی بی)،

نمونیا اور دیگر خطرناک بیماریوں سے مؤثر بچاؤ ممکن ہے۔ان کا کہنا تھا کہ بروقت ویکسینیشن نہ صرف بچوں کو مہلک بیماریوں سے محفوظ رکھتی ہے بلکہ ایک صحت مند اور مضبوط معاشرے کی تشکیل میں بھی اہم کردار ادا کرتی ہے۔ حکومت کی جانب سے یہ پروگرام مکمل طور پر مفت فراہم کیا جا رہا ہے تاکہ ہر طبقہ اس سے مستفید ہو سکے۔محکمہ صحت نے اپنے پیغام میں والدین پر زور دیا ہے کہ وہ افواہوں اور غلط فہمیوں سے بچیں اور مستند طبی معلومات پر بھروسہ کریں۔ انہوں نے کہا کہ ویکسین محفوظ، مؤثر اور عالمی سطح پر تسلیم شدہ طریقہ علاج ہیں جو لاکھوں بچوں کی زندگیاں بچا چکے ہیں۔
چیپ آرگنائزیشن نے اس عزم کا اظہار کیا ہے کہ ایسی آگاہی مہمات کے ذریعے عوام میں شعور بیدار کیا جائے گا تاکہ ہر بچہ مہلک بیماریوں سے محفوظ رہے اور ایک صحت مند معاشرہ تشکیل دیا جا سکے۔