ایران کا مذاکرات کے دوسرے دور کیلئے پاکستان نہ آنے کا اعلان

ایرانی وزارت خارجہ کے ترجمان اسماعیل بقائی نے کہا ہے کہ امریکا نے سیز فائر معاہدے کی خلاف ورزی کی ہے، جس سے صورتحال مزید کشیدہ ہو گئی ہے۔ انہوں نے بتایا کہ ایران نے اس معاملے سے متعلق ثالث کے طور پر پاکستان کو بھی آگاہ کر دیا ہے۔

ترجمان کے مطابق ایران کے یورینیئم کا معاملہ نہایت حساس ہے اور یہ ملک کی سرزمین جتنا مقدس ہے، اس لیے اسے کسی کے حوالے نہیں کیا جا سکتا۔

اسماعیل بقائی نے واضح کیا کہ اس وقت ایران اور امریکا کے درمیان کسی نئے مذاکراتی دور کا کوئی منصوبہ زیر غور نہیں، کیونکہ موجودہ حالات میں واشنگٹن کے ساتھ براہ راست بات چیت کا کوئی امکان نہیں۔

انہوں نے کہا کہ امریکا نے ثابت کر دیا ہے کہ وہ سفارتی عمل کو آگے بڑھانے میں سنجیدہ نہیں، جبکہ دونوں ممالک کے درمیان بنیادی اختلافات بدستور برقرار ہیں۔

سیاسی مبصرین کے مطابق حالیہ کشیدگی، بحری تنازعات اور جوہری پروگرام سے متعلق اختلافات نے مذاکراتی عمل کو مزید پیچیدہ بنا دیا ہے، جس سے خطے میں امن کی صورتحال متاثر ہونے کا خدشہ ہے۔