وزیراعظم نے وفاقی کابینہ کا اجلاس طلب کرلیا

اسلام آباد: وزیراعظم شہباز شریف نے وفاقی کابینہ کا اجلاس طلب کر لیا ہے جس میں انہیں مشرق وسطیٰ کی موجودہ صورتحال پر کابینہ کو اعتماد میں لینے کی توقع ہے۔

ذرائع کے مطابق اجلاس میں وزیراعظم اپنے حالیہ سفارتی رابطوں، دوست ممالک سے ہونے والی بات چیت اور خطے کی تازہ صورتحال سے متعلق تفصیلات کابینہ کے سامنے رکھیں گے۔

مزید بتایا گیا ہے کہ اجلاس میں وزیراعظم کے مجوزہ دورۂ سعودی عرب پر بھی مشاورت ہوگی، جہاں انہیں سعودی ولی عہد کی جانب سے خصوصی دعوت موصول ہوئی ہے۔

ذرائع کا کہنا ہے کہ اس دورے کی تاریخ اور شیڈول کو حتمی شکل دی جا رہی ہے، جبکہ اس دوران ایران اور امریکا کے درمیان جاری مذاکرات اور مشرق وسطیٰ کی مجموعی صورتحال پر بھی تبادلہ خیال کیا جائے گا۔

حکام کے مطابق وزیراعظم آئندہ 48 گھنٹوں میں ممکنہ دورۂ سعودی عرب میں اعلیٰ سعودی قیادت سے ملاقات کریں گے، جس میں خطے کے اہم عالمی امور زیر غور آئیں گے۔