پاکستانی سفارتکاری کے دنیا بھر میں مثبت اثرات، تیل کی قیمت میں 19 فیصد تک کمی

وزیرِ اعظم شہباز شریف نے اعلان کیا ہے کہ امریکا اور ایران کے درمیان دو ہفتوں کی مشروط جنگ بندی پر اتفاق ہو گیا ہے، جس سے مشرقِ وسطیٰ میں بڑھتی کشیدگی کو عارضی طور پر روک دیا گیا ہے۔ یہ پیش رفت پاکستان کی فعال اور مؤثر سفارتکاری کا نتیجہ قرار دی جا رہی ہے۔

وزیرِ اعظم کے مطابق دونوں ممالک کے وفود کو 10 اپریل کو اسلام آباد مدعو کیا گیا ہے تاکہ جاری تنازعات کے مستقل حل کے لیے باضابطہ مذاکرات کیے جا سکیں۔ انہوں نے اس اقدام کو امن و استحکام کی جانب ایک اہم قدم قرار دیتے ہوئے امید ظاہر کی کہ یہ مذاکرات خطے میں دیرپا امن کا باعث بنیں گے۔

امریکی صدر ڈونلڈ ٹرمپ نے بھی جنگ بندی کی تصدیق کرتے ہوئے کہا کہ امریکا ایران کے خلاف اپنی کارروائیاں دو ہفتوں کے لیے معطل کرنے کو تیار ہے، بشرطیکہ ایران آبنائے ہرمز کو مکمل، محفوظ اور فوری طور پر کھولنے پر آمادہ ہو۔ انہوں نے اس پیش رفت کو دو طرفہ جنگ بندی قرار دیا۔

دوسری جانب ایران کے وزیرِ خارجہ عباس عراقچی نے پاکستان کی سفارتی کوششوں کو سراہتے ہوئے کہا کہ اگر ایران پر حملے روک دیے جائیں تو ایران بھی اپنی کارروائیاں معطل کرنے کے لیے تیار ہے۔ انہوں نے عندیہ دیا کہ آبنائے ہرمز سے محدود مدت کے لیے محفوظ آمدورفت ممکن بنائی جائے گی۔

عالمی میڈیا کے مطابق ایران اور امریکا کے درمیان براہِ راست مذاکرات اسلام آباد میں ہونے پر اتفاق کیا گیا ہے، جہاں پاکستان ثالثی کا کردار ادا کرے گا۔ یہ مذاکرات 10 اپریل سے شروع ہو کر تقریباً دو ہفتے جاری رہ سکتے ہیں۔

ادھر جنگ بندی کے اعلان کے بعد عالمی منڈیوں میں مثبت ردعمل سامنے آیا ہے۔ تیل کی قیمتوں میں نمایاں کمی جبکہ اسٹاک مارکیٹس میں تیزی دیکھی گئی ہے، جسے خطے میں کشیدگی میں کمی کا فوری اثر قرار دیا جا رہا ہے۔

بین الاقوامی رہنماؤں اور ماہرین نے بھی اس پیش رفت کو سراہتے ہوئے پاکستان کی سفارتکاری کو اہم کامیابی قرار دیا ہے اور امید ظاہر کی ہے کہ یہ عمل خطے میں مستقل امن کی راہ ہموار کرے گا۔