جناح روڈ اور سرکلر روڈ کی فٹ پاتھ منشیات کے عادی افراد کی آماجگاہ بن گئیں

کوئٹہ کے جناح روڈ اور سرکلر روڈ پر منشیات کے عادی افراد کا کھلے عام قبضہ تشویشناک حد تک بڑھ گیا ہے۔ فٹ پاتھ جو عوام کے لیے بنائے گئے تھے، نشئیوں کے ٹھکانوں میں بدل چکے ہیں، جہاں دن دہاڑے نشہ کیا جا رہا ہے۔

شہریوں کا کہنا ہے کہ یہ نہ صرف شہر کی بدصورتی بلکہ خواتین، بچوں اور عام شہریوں کے لیے شدید عدم تحفظ کا باعث ہے۔ موجودہ صورتحال قانون نافذ کرنے والے اداروں کی کارکردگی پر سوالیہ نشان ہے اور ریاستی رٹ صرف کاغذوں تک محدود محسوس ہوتی ہے۔

شہری مطالبہ کرتے ہیں کہ جناح روڈ اور سرکلر روڈ سے نشئی افراد کو فوری طور پر نکالا جائے، مستقل کریک ڈاؤن کیا جائے، اور متاثرین کی بحالی کے لیے مؤثر اقدامات کیے جائیں، ورنہ پورے شہر کو خطرہ لاحق ہو سکتا ہے۔