اسٹاک مارکیٹ میں شدید مندی، انڈیکس 3700 پوائنٹس گر گیا

اسلام آباد: پاکستان اسٹاک ایکسچینج میں پیر کے روز شدید مندی دیکھی گئی، جہاں کے ایس ای 100 انڈیکس 3,757.20 پوائنٹس یا 2.48 فیصد کمی کے ساتھ 147,950.31 پوائنٹس پر آ گیا۔ اس مندی کی بڑی وجہ مشرق وسطیٰ میں بڑھتی کشیدگی اور طویل جنگ کے خدشات ہیں۔

مارکیٹ میں آٹو موبائل، سیمنٹ، بینکنگ، آئل اینڈ گیس، پاور اور ریفائنری سیکٹرز میں فروخت کا دباؤ نمایاں رہا۔ اہم کمپنیوں جیسے ARL، HUBCO، MARI، OGDC، PPL، HBL، MEBL، MCB اور NBP کے شیئرز منفی زون میں ٹریڈ ہوئے، جس سے مجموعی مارکیٹ پر دباؤ بڑھا۔

ماہرین کا کہنا ہے کہ سرمایہ کاروں کا اعتماد ایران سے متعلق تنازع کے طول پکڑنے اور عالمی سطح پر تیل کی قیمتوں میں اضافے اور مہنگائی کے خدشات سے متاثر ہو رہا ہے۔

گذشتہ ہفتے بھی مارکیٹ غیر یقینی صورتحال کا شکار رہی تھی، جب 100 انڈیکس 1,032 پوائنٹس کی کمی کے ساتھ 151,707 پوائنٹس پر بند ہوا۔ عالمی منڈیوں میں بھی منفی رجحان دیکھا گیا، جاپان کا نکئی انڈیکس تقریباً 4.7 فیصد گر گیا جبکہ دیگر بڑی مارکیٹس بھی دباؤ میں رہیں۔

تجزیہ کاروں کے مطابق اگر خطے میں کشیدگی برقرار رہی تو پاکستان سمیت عالمی اسٹاک مارکیٹس مزید دباؤ کا شکار ہو سکتی ہیں۔