پاکستان کی درخواست پر 2 ایرانی رہنماؤں کو امریکی ٹارگٹ لسٹ سے ہٹایا گیا، عالمی میڈیا کا دعویٰ

واشنگٹن: خبر رساں ادارے رائٹرز کے مطابق پاکستان کی سفارتی کوششوں کے نتیجے میں ایران کے دو اہم عہدیداروں کو ٹارگٹ لسٹ سے نکال دیا گیا، جسے ممکنہ مذاکرات کے لیے اہم پیش رفت قرار دیا جا رہا ہے۔

رپورٹ کے مطابق ایرانی وزیر خارجہ عباس عراقچی اور ایرانی پارلیمنٹ کے اسپیکر محمد باقر قالیباف کو پاکستان کی درخواست پر اس فہرست سے ہٹایا گیا۔

ذرائع کا کہنا ہے کہ پاکستان نے امریکا کو باور کرایا کہ اگر یہ اہم شخصیات نشانہ بن گئیں تو سفارتی عمل متاثر ہوگا اور مذاکرات کا راستہ مکمل طور پر بند ہو سکتا ہے۔

پاکستان نے واشنگٹن پر زور دیا کہ مذاکراتی عمل کو جاری رکھنے کے لیے ان رہنماؤں کا محفوظ رہنا ناگزیر ہے، تاکہ کسی بھی ممکنہ بات چیت کو آگے بڑھایا جا سکے۔

رپورٹ میں یہ بھی بتایا گیا ہے کہ امریکا نے اسرائیل کو کشیدگی کم کرنے کے لیے محتاط رویہ اختیار کرنے کا مشورہ دیا ہے، تاکہ خطے میں حالات مزید خراب نہ ہوں۔

ماہرین کے مطابق یہ اقدام بڑھتی ہوئی علاقائی کشیدگی کے دوران ایک اہم سفارتی پیش رفت ہے، جس کا مقصد جنگ بندی اور مذاکرات کے امکانات کو برقرار رکھنا ہے۔