ریلوے حادثات میں اضافہ، کراچی سے لاہور جانے والی ٹرین دو حصوں میں تقسیم

خانیوال: کراچی سے لاہور جانے والی قراقرم ایکسپریس خانیوال جنکشن کے قریب حادثے کا شکار ہو کر دو حصوں میں تقسیم ہوگئی۔

ریلوے ذرائع کے مطابق واقعہ اس وقت پیش آیا جب ٹرین لوپ لائن میں داخل ہو رہی تھی کہ اچانک کپلنگ ٹوٹ گئی، جس کے نتیجے میں چلتی ٹرین دو حصوں میں بٹ گئی۔

حادثے کے باعث مسافروں میں شدید خوف و ہراس پھیل گیا، تاہم خوش قسمتی سے کوئی جانی نقصان نہیں ہوا۔

واقعے کے بعد اَپ اور ڈاؤن دونوں ٹریکس پر ٹرینوں کی آمدورفت معطل کر دی گئی اور کئی ٹرینیں مختلف اسٹیشنز پر روک دی گئیں۔

ریلوے حکام اور امدادی ٹیمیں فوری طور پر موقع پر پہنچ گئیں اور ٹریک کی بحالی کے لیے کام تیزی سے جاری ہے۔

واضح رہے کہ چند روز قبل تیزگام ایکسپریس بھی لودھراں کے قریب اسی نوعیت کے حادثے کا شکار ہوئی تھی، جس میں کئی مسافر زخمی ہوئے تھے اور ٹرین کی کچھ بوگیاں پٹڑی سے اتر گئی تھیں۔