دہشت گردوں اور ان کے سہولت کاروں کے خلاف کارروائیاں جاری رہیں گی، وزیر اعلیٰ بلوچستان

وزیر اعلیٰ بلوچستان میر سرفراز بگٹی نے ضلع کیچ کے علاقے میناز، بولیدہ میں سیکیورٹی فورسز کی کارروائی کے دوران ایک دہشت گرد کی ہلاکت پر اطمینان کا اظہار کیا ہے۔

میر سرفراز بگٹی نے کہا کہ آپریشن ردالفتنہ 3 کے تحت دہشت گردوں کے خلاف مؤثر کارروائیاں امن دشمن عناصر کے عزائم ناکام بنانے کے لیے ضروری ہیں۔ ان کے مطابق دو خواتین کو اپنے ہمراہ لے جانے والے دہشت گردوں کے خلاف بروقت کارروائی سیکیورٹی فورسز کی مستعدی اور پیشہ ورانہ صلاحیتوں کا مظہر ہے۔

وزیر اعلیٰ نے کہا کہ بلوچستان میں امن و امان کے قیام اور عوام کے جان و مال کے تحفظ کے لیے سیکیورٹی فورسز کی خدمات قابلِ تحسین ہیں۔ انہوں نے واضح کیا کہ دہشت گردوں اور ان کے سہولت کاروں کے خلاف کارروائیاں جاری رکھی جائیں گی۔

میر سرفراز بگٹی کا کہنا تھا کہ بلوچستان سے دہشت گردی کے خاتمے اور پائیدار امن کے قیام کے لیے ریاست کا عزم غیر متزلزل ہے۔