ہانگ کانگ سپر سکسز: پاکستان نے بھارت کو 4 وکٹ سے شکست دیدی

ہانگ کانگ: ہانگ کانگ میں جاری سپر سکسز ٹورنامنٹ کے گروپ سی کے میچ میں پاکستان نے بھارت کو 4 وکٹوں سے شکست دے دی۔

مشن روڈ گراؤنڈ میں کھیلے گئے میچ میں پاکستان کے کپتان عباس آفریدی نے ٹاس جیت کر بھارت کو پہلے بیٹنگ کی دعوت دی۔ بھارتی ٹیم نے مقررہ 6 اوورز میں 88 رنز بنائے، ششانک سنگھ نے 11 گیندوں پر 40 رنز کی اننگز کھیلی۔

پاکستان کی جانب سے عبدالصمد نے ایک اوور میں 10 رنز دے کر 2 وکٹیں حاصل کیں، جبکہ احمد دانیال اور محمد شہزاد نے ایک، ایک کھلاڑی کو آؤٹ کیا۔

جواب میں پاکستان نے مطلوبہ ہدف صرف 3.5 اوورز میں 4 وکٹوں کے نقصان پر حاصل کرلیا۔ خواجہ نافع نے 12 گیندوں پر 2 چوکوں اور 5 چھکوں کی مدد سے 41 رنز بنائے، جبکہ کپتان عباس آفریدی نے 35 رنز اسکور کیے۔

عبدالصمد 7 اور عرفان خان 6 رنز کے ساتھ ناٹ آؤٹ رہے۔