فیلڈ مارشل امن کے پیامبر بن کر تہران گئے، میری موجودگی ضروری نہیں تھی خواجہ آصف کا مولانا کو جواب

وزیر دفاع خواجہ آصف نے کہا ہے کہ تہران میں ہونے والی ملاقاتوں میں ان کی موجودگی ضروری نہیں تھی، کیونکہ فیلڈ مارشل سید عاصم منیر خطے میں امن کے قیام کے لیے اپنا کردار ادا کر رہے ہیں۔

قومی اسمبلی میں اظہار خیال کرتے ہوئے خواجہ آصف نے مولانا فضل الرحمٰن کے بیان کا جواب دیتے ہوئے کہا کہ تہران میں کوئی دفاعی معاہدہ نہیں ہو رہا تھا۔ فیلڈ مارشل امن کا پیغام لے کر تہران گئے تھے اور ان کی کوششیں خطے میں کشیدگی کم کرنے کے لیے ہیں۔

وزیر دفاع کا کہنا تھا کہ فیلڈ مارشل نے پاک بھارت جنگ کے بعد بھی پاکستان کے لیے اہم کردار ادا کیا اور عالمی سطح پر امن کے قیام کے لیے کوششیں کر رہے ہیں۔

خواجہ آصف نے کہا کہ یمن کا تنازع مزید شدت اختیار کرسکتا تھا، تاہم حالات کو بگڑنے سے روکنے کے لیے کردار ادا کیا گیا۔ انہوں نے سیاسی اختلافات کے باوجود وسیع القلبی کا مظاہرہ کرنے پر زور دیتے ہوئے کہا کہ ملکی اور علاقائی معاملات پر اختلافات میں برداشت کا دامن ہاتھ سے نہیں چھوڑنا چاہیے۔