میرٹ پر اصلاحات سے قوم پرست جماعتیں خائف کیوں ہیں؟ میر ظہور بلیدی کا سوال

صوبائی وزیر منصوبہ بندی و ترقیات میر ظہور بلیدی نے کہا ہے کہ بلوچستان حکومت نے گریڈ 11 سے اوپر کی آسامیوں پر بھرتیوں کے لیے مصنوعی ذہانت (AI) کے استعمال کی پالیسی منظور کی ہے، جس کا مقصد تعلیم یافتہ نوجوانوں کو شفاف اور میرٹ پر مبنی مواقع فراہم کرنا ہے۔

میر ظہور بلیدی نے قوم پرست جماعتوں پر تنقید کرتے ہوئے سوال اٹھایا کہ وہ میرٹ پر مبنی اصلاحات سے خائف کیوں رہتی ہیں؟ انہوں نے کہا کہ حکومت نے کلاس فور کی بھرتیوں کے لیے نہیں بلکہ گریڈ 11 سے اوپر کی آسامیوں کے لیے مصنوعی ذہانت کے استعمال کی پالیسی منظور کی ہے۔

صوبائی وزیر نے سوال کیا کہ کیا متعلقہ سینیٹر ان حقائق سے لاعلم ہیں یا دانستہ طور پر گمراہ کن تاثر پیش کر رہے ہیں؟ انہوں نے مزید پوچھا کہ کیا میرٹ کی مخالفت کا مقصد روایتی سیاست کو برقرار رکھنا ہے؟

بلوچستان حکومت کی جانب سے سرکاری بھرتیوں میں شفافیت اور میرٹ کے فروغ کے لیے مصنوعی ذہانت کے استعمال کی پالیسی سے متعلق خبریں بھی سامنے آ چکی ہیں۔