دھابیجی پمپنگ کمپلیکس کے قریب آگ، کے ڈبلیو ایس سی کی کیبلز متاثر

کراچی: دھابیجی پمپنگ کمپلیکس کے قریب جھاڑیوں میں آگ لگنے کے باعث کراچی واٹر اینڈ سیوریج کارپوریشن (کے ڈبلیو ایس سی) کی کیبلز متاثر ہوگئیں۔

کے الیکٹرک کے ترجمان کے مطابق واقعے کے بعد بجلی کی کمپنی نے فوری طور پر عملہ تعینات کیا، جس نے ہنگامی بنیادوں پر کام کرتے ہوئے متاثرہ کیبلز کا فالٹ کم سے کم وقت میں دور کردیا۔

ترجمان نے بتایا کہ زیرِ زمین کیبل میں بھی ایک اور فالٹ سامنے آیا، تاہم اس کے باوجود 22 میں سے 20 پمپنگ موٹرز کو بجلی کی فراہمی جاری رہی۔ کے الیکٹرک کی ٹیم نے اضافی فالٹ کی بھی فوری طور پر درستگی یقینی بنائی۔

کے الیکٹرک کے مطابق تقریباً 3 ماہ قبل کے ڈبلیو ایس سی کو اس کے انفرااسٹرکچر میں بہتری کے لیے ایک مشاورتی منصوبہ پیش کیا گیا تھا، تاہم اس منصوبے پر کے ڈبلیو ایس سی کے حتمی جواب کا انتظار ہے۔

ترجمان کا کہنا ہے کہ مشاورتی منصوبے پر عمل درآمد سے کے ڈبلیو ایس سی کے انفرااسٹرکچر میں بہتری لائی جاسکتی ہے اور مستقبل میں متوقع فالٹس میں نمایاں کمی ممکن ہوگی۔