پاکستان، مصر، سعودی عرب اور ترکیہ کا علاقائی امور پر قریبی مشاورت جاری رکھنے پر اتفاق

اسلام آباد: پاکستان، مصر، سعودی عرب اور ترکیہ نے علاقائی معاملات پر قریبی مشاورت کا سلسلہ جاری رکھنے پر اتفاق کیا ہے۔

ترجمان دفتر خارجہ کے مطابق نائب وزیراعظم و وزیر خارجہ اسحاق ڈار نے مصری وزیر خارجہ ڈاکٹر بدر عبدالعاطی سے ٹیلی فون پر گفتگو کی، جس میں پاک مصر دوطرفہ تعلقات اور علاقائی صورتحال پر تبادلہ خیال کیا گیا۔

دونوں وزرائے خارجہ نے پاکستان اور مصر کے درمیان قریبی اور برادرانہ تعلقات کو مزید مضبوط بنانے کے عزم کا اعادہ کیا۔ اسحاق ڈار اور ڈاکٹر بدر عبدالعاطی نے علاقائی امور پر باہمی مشاورت جاری رکھنے کی ضرورت پر بھی اتفاق کیا۔

ترجمان کے مطابق پاکستان، مصر، سعودی عرب اور ترکیہ کے درمیان علاقائی معاملات پر مشاورت کا سلسلہ ریجنل فور (R4) کے وزرائے خارجہ کے ذریعے بھی جاری رکھا جائے گا۔

ٹیلی فونک گفتگو کے دوران دونوں وزرائے خارجہ نے آئندہ اقوام متحدہ جنرل اسمبلی کے اجلاس کے موقع پر نیویارک میں ملاقات کرنے پر بھی اتفاق کیا۔