پاکستان، سعودی عرب، ترکیہ دفاعی معاہدے کے تحت پہلا اجلاس کل استنبول میں ہوگا

اسلام آباد: پاکستان، سعودی عرب اور ترکیہ کے درمیان مکہ میں طے پانے والے مشترکہ دفاعی معاہدے کے تحت پہلا اجلاس کل استنبول میں ہوگا، جس میں تینوں ممالک کے اعلیٰ حکام دفاعی تعاون اور معاہدے پر پیش رفت کا جائزہ لیں گے۔

ترجمان دفتر خارجہ کے مطابق نائب وزیراعظم اور وزیر خارجہ اسحاق ڈار سرکاری دورے پر استنبول پہنچ گئے ہیں، جہاں وہ اجلاس میں پاکستان کی نمائندگی کریں گے۔

اجلاس میں بین الاقوامی سلامتی کی صورتحال، دفاعی صلاحیتوں میں بہتری، مسلح افواج کے درمیان تعاون اور دفاعی صنعت میں مشترکہ تعاون سمیت مختلف امور زیر بحث آنے کا امکان ہے۔

مکہ مشترکہ دفاعی معاہدہ رواں ماہ پاکستان، سعودی عرب اور ترکیہ کے درمیان طے پایا تھا، جس کا مقصد مشترکہ دفاع، سلامتی اور خطے میں استحکام کے لیے تعاون کو فروغ دینا ہے۔

ترجمان کے مطابق اسحاق ڈار استنبول میں اپنے قیام کے دوران دیگر اہم ملاقاتیں بھی کریں گے۔