ٹاسک فورس برائے بحری اصلاحات؛ ملکی بندرگاہوں کی بہتری میں اہم پیشرفت

اسلام آباد: وزیراعظم ٹاسک فورس برائے بحری اصلاحات کے تحت ملکی بندرگاہوں کی کارکردگی بہتر بنانے کے لیے اصلاحاتی اقدامات میں اہم پیش رفت سامنے آئی ہے۔

حکام کے مطابق بندرگاہی نظام میں جدید سہولیات، بہتر انتظامی طریقہ کار اور مؤثر نگرانی کے ذریعے تجارتی سرگرمیوں کو فروغ دینے پر کام جاری ہے۔

بندرگاہی شعبے کے لیے ہنرمند افرادی قوت تیار کرنے کی غرض سے عالمی معیار کا خصوصی تربیتی ادارہ قائم کرنے کی تجویز بھی زیر غور ہے۔ اس کے علاوہ بندرگاہوں، آف ڈاک ٹرمینلز، کسٹمز اسٹیشنز اور تجارتی نظام کے سالانہ و اچانک معائنے کے لیے مؤثر نگرانی کا نظام وضع کیا جائے گا۔

بندرگاہی معائنہ گاہوں میں جدید سہولیات اور محفوظ ماحول کی فراہمی سے کارگو ہینڈلنگ کا عمل تیز اور مؤثر بنانے میں مدد ملے گی۔ کسٹمز قوانین کے تحت معائنہ مراکز کی اپ گریڈیشن، 24 گھنٹے آپریشن اور جدید اسکیننگ سہولیات کی فراہمی پر بھی توجہ دی جا رہی ہے۔

ٹاسک فورس اور این ایل سی سمیت متعلقہ ادارے جدید آلات، سی سی ٹی وی نگرانی اور بہتر سیکیورٹی کے ذریعے کارگو معائنے کے عمل کو مزید تیز اور شفاف بنانے کے لیے مربوط اقدامات کر رہے ہیں۔

اس کے علاوہ پورٹیبل ویئنگ اسکیلز کی فراہمی، باقاعدہ کیلیبریشن اور ہائی ویلیو کارگو ایریاز میں توسیع سمیت دیگر آپریشنل مسائل کے حل پر بھی کام جاری ہے۔

حکام کا کہنا ہے کہ بندرگاہی انفرااسٹرکچر کی اپ گریڈیشن اور انتظامی اصلاحات سے پاکستان کی تجارتی استعداد میں اضافہ ہوگا اور عالمی تجارت میں ملک کی مسابقتی حیثیت مزید مضبوط ہوگی۔