پمز سانحہ؛ وزیراعظم کو تحقیقاتی کمیٹی کی عبوری رپورٹ آج پیش کی جائے گی

اسلام آباد: پمز آتشزدگی کے افسوسناک واقعے کی تحقیقات کرنے والی اعلیٰ سطحی کمیٹی آج وزیراعظم کو اپنی عبوری رپورٹ پیش کرے گی، جبکہ حتمی رپورٹ پانچ روز میں مکمل کرکے سفارشات کے ساتھ پیش کی جائے گی۔

تحقیقاتی کمیٹی نے پمز کے متعلقہ ایگزیکٹو ڈائریکٹر، جوائنٹ ایگزیکٹو ڈائریکٹرز اور میڈیکل افسران کے بیانات قلمبند کرلیے ہیں، جبکہ آگ لگنے کی وجوہات اور ریسپانس سے متعلق سی سی ٹی وی فوٹیج کا بھی جائزہ لیا گیا ہے۔

کمیٹی نے فائر بریگیڈ ہیڈکوارٹر کا دورہ کرکے کیپیٹل ایمرجنسی سروسز کے افسران اور ریسکیو آپریشن میں شریک اہلکاروں کے بیانات بھی ریکارڈ کیے۔

تحقیقاتی ٹیم نے آگ لگنے سے لے کر ریسکیو ٹیموں کی آمد تک کی ٹائم لائن، فائر بریگیڈ کے رسپانس، ریسکیو کارروائی میں پیش آنے والی رکاوٹوں اور دیگر متعلقہ امور کا بھی جائزہ لیا۔

وزیراعظم کی ہدایت پر قائم تحقیقاتی کمیٹی کی سربراہی ریٹائرڈ وفاقی سیکرٹری شاہد خان کر رہے ہیں، جبکہ میجر جنرل (ر) ڈاکٹر خورشید اُترا، ڈاکٹر بیرسٹر نبیل احمد اعوان اور ڈپٹی کمشنر اسلام آباد کمیٹی کے ارکان میں شامل ہیں۔

کمیٹی کو 48 گھنٹے میں عبوری رپورٹ جبکہ پانچ روز میں مکمل تحقیقات اور سفارشات پر مشتمل حتمی رپورٹ پیش کرنے کی ہدایت کی گئی ہے۔