عمران خان کو سخت سیکیورٹی میں شفا اسپتال سے اڈیالہ جیل منتقل کر دیا گیا

اسلام آباد: بانی پی ٹی آئی عمران خان کو شفا انٹرنیشنل اسپتال میں طبی معائنے کے بعد سخت سیکیورٹی انتظامات میں دوبارہ اڈیالہ جیل منتقل کردیا گیا۔

جیل ذرائع کے مطابق عمران خان کو رات ساڑھے 12 بجے اڈیالہ جیل سے نجی اسپتال منتقل کیا گیا، جہاں ڈاکٹروں کی ٹیم نے ان کا طبی معائنہ کیا۔ طبی عمل مکمل ہونے کے بعد انہیں صبح 6 بج کر 5 منٹ پر واپس اڈیالہ جیل پہنچایا گیا۔

ذرائع کے مطابق جیل پہنچنے پر عمران خان کو ان کے مخصوص کمپاؤنڈ میں منتقل کردیا گیا۔ منتقلی کے دوران سیکیورٹی کے سخت انتظامات کیے گئے اور اطراف کے علاقوں میں بھی نگرانی بڑھا دی گئی تھی۔

واضح رہے کہ سپریم کورٹ کے حکم پر عمران خان کو طبی سہولیات کے لیے شفا انٹرنیشنل اسپتال منتقل کیا گیا تھا، جہاں ان کے ذاتی معالج ڈاکٹر فیصل اور بہن ڈاکٹر عظمیٰ بھی موجود تھیں۔

اسپتال میں سیکیورٹی انتظامات کے لیے آئی جی اسلام آباد سمیت دیگر پولیس افسران بھی موجود رہے، جبکہ شفا اسپتال کے اطراف سیکیورٹی ہائی الرٹ کردی گئی تھی۔