یونیورسٹی آف لورالائی اور ہاؤس آف کامنز اکیڈمی اسلام آباد کے درمیان مفاہمتی یادداشت، طلبہ کے لیے نئے مواقع

لورالائی(میاں محمدعامربشیر آرائیں )یونیورسٹی آف لورالائی نے بلوچستان کے نوجوانوں کو معیاری مسابقتی امتحانات کی تیاری کے بہتر اور جدید مواقع فراہم کرنے کے لیے ہاؤس آف کامنز اکیڈمی اسلام آباد کے ساتھ مفاہمتی یادداشت پر دستخط کر دیے۔ اس شراکت داری کو یونیورسٹی آف لورالائی کی جانب سے طلبہ کی تعلیمی، پیشہ ورانہ اور عملی صلاحیتوں کے فروغ کی جانب ایک اہم پیش رفت قرار دیا جا رہا ہے۔مفاہمتی یادداشت پر یونیورسٹی آف لورالائی کے ڈائریکٹر اورک اسلم زیب نے وائس چانسلر انجینئر پروفیسر ڈاکٹر احسان اللہ کاکڑ کی جانب سے دستخط کیے، جبکہ ہاؤس آف کامنز اکیڈمی اسلام آباد کی نمائندگی بورڈ آف ڈائریکٹرز کے اراکین گل زمان خان اور تیمور خان نے کی۔اس موقع پر یونیورسٹی آف لورالائی کے ڈائریکٹر ٹریننگز آفاق امیر زیب اور اسسٹنٹ رجسٹرار ایڈمن محمد بلال بھی موجود تھے۔ تقریب کے دوران فریقین نے نوجوانوں کو جدید تعلیمی سہولیات، مسابقتی امتحانات کی معیاری تیاری اور پیشہ ورانہ رہنمائی فراہم کرنے کے عزم کا اظہار کیا۔مفاہمتی یادداشت کے تحت یونیورسٹی آف لورالائی کے طلبہ کو سی ایس ایس، پی ایم ایس اور دیگر مسابقتی امتحانات کی تیاری کے لیے منظم تعلیمی رہنمائی فراہم کی جائے گی۔ اس تعاون میں ماک ٹیسٹس، امتحانی مشق، تجربہ کار ماہرین کی جانب سے رہنمائی، مینٹورشپ، تحریری و تجزیاتی صلاحیتوں کی بہتری اور خصوصی انٹرویو تیاری جیسے پروگرام شامل ہوں گے۔شراکت داری کی ایک اہم خصوصیت ہائبرڈ اور آن لائن تعلیم کے مواقع بھی ہیں، جس کے ذریعے ایسے طلبہ بھی ان سہولیات سے فائدہ اٹھا سکیں گے جو جغرافیائی یا دیگر وجوہات کی بنا پر بڑے شہروں میں قائم مسابقتی امتحانات کے مراکز تک باقاعدگی سے رسائی حاصل نہیں کر پاتے۔ اس اقدام سے بلوچستان کے دور دراز علاقوں کے نوجوانوں کے لیے معیاری تیاری کے مواقع میں اضافہ ہوگا۔یونیورسٹی آف لورالائی کی جانب سے کہا گیا کہ بلوچستان کے نوجوان بے پناہ صلاحیتوں کے مالک ہیں اور انہیں اگر مناسب تعلیمی رہنمائی، جدید وسائل اور مطلوبہ پلیٹ فارم میسر آئے تو وہ ملک کے اعلیٰ ترین مسابقتی امتحانات میں نمایاں کامیابیاں حاصل کر سکتے ہیں۔ ہاؤس آف کامنز اکیڈمی کے ساتھ یہ تعاون اسی مقصد کے تحت طلبہ کو ایک منظم اور مؤثر تعلیمی ماحول فراہم کرنے کی کوشش ہے۔
وائس چانسلر انجینئر پروفیسر ڈاکٹر احسان اللہ کاکڑ کی قیادت میں یونیورسٹی آف لورالائی کی جانب سے طلبہ کو صرف روایتی تعلیم تک محدود رکھنے کے بجائے انہیں عملی زندگی، مسابقتی امتحانات اور پیشہ ورانہ میدان کے لیے تیار کرنے پر خصوصی توجہ دی جا رہی ہے۔ مختلف تعلیمی اور تربیتی اداروں کے ساتھ اشتراک اسی پالیسی کا حصہ ہے، جس کا بنیادی مقصد طلبہ کی صلاحیتوں کو اجاگر کرنا اور انہیں قومی سطح پر مقابلے کے لیے تیار کرنا ہے۔
مفاہمتی یادداشت کے ذریعے دونوں اداروں کے درمیان علمی اور تربیتی تعاون کو فروغ ملے گا، جبکہ مستقبل میں طلبہ کے لیے مختلف تربیتی پروگرام، رہنمائی کے سیشنز اور امتحانی تیاری سے متعلق سرگرمیاں بھی منعقد کی جا سکیں گی۔ اس تعاون سے طلبہ کو امتحانی طریقہ کار، وقت کے مؤثر استعمال، تحریری اظہار، عمومی معلومات، تجزیاتی سوچ اور انٹرویو کی تیاری جیسے اہم شعبوں میں رہنمائی حاصل ہونے کی توقع ہے۔یونیورسٹی آف لورالائی اور ہاؤس آف کامنز اکیڈمی کے درمیان یہ مفاہمتی یادداشت بلوچستان کے نوجوانوں کو قومی سطح کے مسابقتی امتحانات میں آگے بڑھنے کے لیے بہتر پلیٹ فارم فراہم کرنے کی جانب ایک مثبت قدم ہے۔ اس سے نہ صرف طلبہ کی تعلیمی استعداد میں اضافہ ہوگا بلکہ انہیں مستقبل کے بہتر کیریئر کے انتخاب اور قومی اداروں میں اپنی صلاحیتوں کے اظہار کے لیے بھی مواقع میسر آئیں گے۔یونیورسٹی آف لورالائی نے اس عزم کا اعادہ کیا ہے کہ نوجوانوں کی تعلیم، تربیت، کردار سازی، پیشہ ورانہ ترقی اور بااختیار بنانے کے لیےک ایسے تمام اقدامات جاری رکھے جائیں گے جن سے بلوچستان کے طلبہ کو معیاری تعلیم اور جدید تربیتی مواقع تک رسائی حاصل ہو۔
یہ شراکت داری اس عزم کی عکاس ہے کہ یونیورسٹی آف لورالائی نوجوانوں کو بااختیار بنانے، مواقع کو وسعت دینے اور انہیں قومی سطح پر کامیابی کے لیے تیار کرنے کے سفر کو مزید مضبوط بنائے گی۔