عمران خان طبی معائنہ؛ عظمیٰ خان کی موجودگی میں ڈاکٹروں نے صحتمند قرار دیا، عطا تارڑ

اسلام آباد: وفاقی وزیر اطلاعات عطا اللہ تارڑ نے کہا ہے کہ سابق وزیراعظم عمران خان کا طبی معائنہ ان کی بہن عظمیٰ خان کی موجودگی میں کیا گیا، جس کے بعد ڈاکٹروں نے انہیں طبی طور پر صحت مند قرار دیا۔

عطا تارڑ کے مطابق سپریم کورٹ کے فیصلے کی روشنی میں عمران خان کو 20 اور 21 اگست کی درمیانی شب سخت حفاظتی انتظامات کے تحت طبی معائنے کے لیے اسپتال منتقل کیا گیا۔

انہوں نے بتایا کہ ماہر امراض چشم، ماہر امراض قلب اور فزیشن سمیت ڈاکٹروں کی ٹیم نے عمران خان کا تفصیلی معائنہ کیا۔ ان کے مطابق طبی معائنے کے دوران عظمیٰ خان بھی موجود رہیں۔

وفاقی وزیر نے کہا کہ طبی مراحل مکمل ہونے کے بعد عمران خان کو 21 اگست کی صبح تقریباً 5 بجے اڈیالہ جیل منتقل کردیا گیا۔

عطا تارڑ کا مزید کہنا تھا کہ طبی معائنہ پمز اسپتال میں کیا گیا، جہاں الشفا اسپتال کے ڈاکٹرز بھی موجود تھے، جبکہ عمران خان کو ضرورت پڑنے پر آئندہ بھی طبی سہولیات فراہم کی جائیں گی۔