طالبان حکومت کے 5 سال، انسانی حقوق کی صورتحال پر عالمی تشویش برقرار

طالبان حکومت کے 5 سال، انسانی حقوق کی صورتحال پر عالمی تشویش برقرار

اسلام آباد: افغانستان میں طالبان کے اقتدار کے پانچ سال مکمل ہونے پر انسانی حقوق کی صورتحال اور سکیورٹی کے معاملات پر عالمی تشویش برقرار ہے۔

اقوام متحدہ کی سلامتی کونسل کے 56 رکن ممالک نے مشترکہ بیان میں افغان عوام کے ساتھ یکجہتی کا اظہار کرتے ہوئے کہا ہے کہ افغانستان کو انسانی حقوق، انسانی امداد، معیشت اور سلامتی کے حوالے سے سنگین چیلنجز کا سامنا ہے۔

مشترکہ بیان میں کہا گیا کہ افغانستان کی موجودہ صورتحال نہ صرف افغان عوام کے لیے مشکلات میں اضافے کا باعث بن رہی ہے بلکہ ہمسایہ ممالک سمیت پورے خطے کے استحکام اور سلامتی کے لیے بھی خطرات پیدا کر رہی ہے۔

بیان کے مطابق افغانستان دنیا کا واحد ملک ہے جہاں لڑکیوں کو ثانوی اور اعلیٰ تعلیم سے محروم رکھا گیا ہے۔ 56 ممالک نے افغان سرزمین پر موجود دہشتگرد گروہوں کو علاقائی سلامتی کے لیے خطرہ قرار دیتے ہوئے طالبان حکومت سے ان کے خلاف مؤثر اقدامات کا مطالبہ کیا۔

عالمی برادری نے افغانستان میں انسانی حقوق کے تحفظ، خواتین اور لڑکیوں کے بنیادی حقوق کی بحالی اور خطے میں امن و سلامتی یقینی بنانے کے لیے عملی اقدامات پر زور دیا ہے۔