مودی حکومت کی میڈیا پالیسی، آزاد صحافت پر کاری ضرب بن گئی

مودی حکومت کی میڈیا پالیسی، آزاد صحافت پر کاری ضرب بن گئی

نئی دہلی: بھارتی وزیراعظم نریندر مودی کی حکومت کی میڈیا پالیسی پر آزاد صحافت اور اظہارِ رائے کی آزادی کے حوالے سے شدید تنقید کی جارہی ہے۔

رپورٹ کے مطابق مودی حکومت کے دور میں بھارتی میڈیا کو حکومتی پالیسیوں پر سوال اٹھانے اور اختلافی مؤقف سامنے لانے کے حوالے سے مختلف پابندیوں اور دباؤ کا سامنا ہے۔ بھارتی جریدے دی وائر کے مطابق حکومت نے قانون کے سیکشن 69 اے کے تحت اختلافی آوازوں اور بعض آن لائن مواد کے خلاف کارروائیوں میں اضافہ کیا ہے۔

رپورٹ میں دعویٰ کیا گیا ہے کہ حکومتی اقدامات کے باعث بھارت میں آزادیٔ اظہار اور آزاد صحافت کے حوالے سے خدشات بڑھ رہے ہیں، جبکہ صحافتی حلقوں کی جانب سے میڈیا پر دباؤ اور سینسرشپ کے رجحان پر تشویش کا اظہار کیا جارہا ہے۔

بھارتی صحافی پوجا پرسنّا کے مطابق رائٹرز انسٹی ٹیوٹ کے اعداد و شمار میں بھارت میں خبروں پر اعتماد کی شرح 39 فیصد جبکہ 52 فیصد افراد کے خبروں سے گریز کرنے کا ذکر کیا گیا ہے۔

رپورٹ کے مطابق مودی حکومت کے دور میں بھارتی میڈیا کی آزادی کے حوالے سے مسلسل سوالات اٹھائے جارہے ہیں، جبکہ صحافتی حلقوں کا کہنا ہے کہ آزاد میڈیا جمہوری معاشرے میں حکومت سے سوال کرنے اور عوام تک مختلف آرا پہنچانے میں بنیادی کردار ادا کرتا ہے۔