وزیراعظم شہباز شریف اور فیلڈ مارشل عاصم منیر نے عمرہ ادا کیا، پاکستان کی سلامتی و خوشحالی کے لیے خصوصی دعائیں

مکہ مکرمہ: وزیراعظم محمد شہباز شریف اور چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے سعودی عرب کے دورے کے دوران مکہ مکرمہ پہنچ کر عمرہ ادا کیا۔

عمرے کی ادائیگی کے موقع پر وزیراعظم، فیلڈ مارشل عاصم منیر اور پاکستانی وفد نے خانہ کعبہ میں نوافل ادا کیے اور پاکستان کی سلامتی، ترقی، خوشحالی اور استحکام کے لیے خصوصی دعائیں مانگیں۔

اس موقع پر امتِ مسلمہ کے اتحاد، عالمِ اسلام میں امن و استحکام اور دنیا بھر کے مظلوم مسلمانوں کی مشکلات کے خاتمے کے لیے بھی بارگاہِ الٰہی میں خصوصی دعا کی گئی۔

وزیراعظم شہباز شریف اور فیلڈ مارشل سید عاصم منیر کو انتہائی عقیدت، خشوع و خضوع کے ساتھ عبادت اور دعا کرتے دیکھا گیا۔

عمرہ کی ادائیگی کے دوران سامنے آنے والی روح پرور تصاویر سوشل میڈیا پر بھی توجہ کا مرکز بن گئیں، جہاں صارفین نے انہیں سراہتے ہوئے نیک تمناؤں کا اظہار کیا۔