این ڈی ایم اے کا ملک میں 24 جولائی تک سیلاب اور لینڈ سلائیڈنگ کا الرٹ جاری

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے ملک کے مختلف علاقوں میں ممکنہ سیلاب، اچانک طغیانی اور لینڈ سلائیڈنگ کے خطرے کے پیش نظر 24 جولائی تک الرٹ جاری کر دیا ہے۔

این ڈی ایم اے کے مطابق دریاؤں، مقامی ندی نالوں اور پہاڑی برساتی گزرگاہوں میں پانی کے بہاؤ میں اضافے کا خدشہ ہے، جبکہ بعض علاقوں میں اچانک سیلابی صورتحال پیدا ہو سکتی ہے۔

ترجمان کے مطابق گلگت بلتستان، آزاد کشمیر، خیبرپختونخوا، پنجاب اور شمال مشرقی بلوچستان کے مختلف علاقوں میں سیلابی ریلوں کا امکان ہے۔

این ڈی ایم اے نے بتایا کہ بھارت کے تھین، پونگ اور بھاکھڑا ڈیمز سے پانی کے اخراج کی صورت میں دریائے راوی اور ستلج میں پانی کے بہاؤ میں اضافہ ہو سکتا ہے۔

راولپنڈی، جہلم، گوجرانوالہ، سرگودھا، خوشاب، سیالکوٹ، گجرات، نارووال، لاہور، اوکاڑہ، چکوال اور اٹک سمیت مختلف علاقوں میں شہری سیلاب کا خدشہ ظاہر کیا گیا ہے۔

این ڈی ایم اے نے ضلعی انتظامیہ کو دریاؤں اور ندی نالوں کی مسلسل نگرانی، امدادی ٹیموں کی پیشگی تعیناتی اور حساس علاقوں میں حفاظتی اقدامات یقینی بنانے کی ہدایت کر دی ہے۔

اس کے علاوہ 21 سے 23 جولائی تک چترال اور گلگت بلتستان کے مختلف پہاڑی علاقوں میں لینڈ سلائیڈنگ، پتھر گرنے اور ملبے کے ریلوں کا خطرہ بھی ظاہر کیا گیا ہے۔

این ڈی ایم اے نے شہریوں کو حساس علاقوں، دریاؤں اور برساتی نالوں سے دور رہنے اور غیر ضروری سفر سے گریز کرنے کی ہدایت کی ہے۔