پیٹرولیم مصنوعات مہنگی؛ جماعت اسلامی کا ملک بھر میں شاہراہیں بند کرنے کا اعلان

لاہور: امیر جماعت اسلامی پاکستان حافظ نعیم الرحمن نے کہا ہے کہ اگر پیٹرولیم مصنوعات پر عائد ٹیکسز ختم کر دیے جائیں تو پیٹرول کی قیمت 250 روپے فی لیٹر سے زیادہ نہیں ہونی چاہیے۔

منصورہ میں پریس کانفرنس کرتے ہوئے حافظ نعیم الرحمن نے کہا کہ پیٹرولیم مصنوعات کی قیمتوں میں اضافے سے عوام شدید مشکلات کا شکار ہیں، جبکہ جنگ کو جواز بنا کر قیمتیں بڑھائی جا رہی ہیں۔

انہوں نے حکومت سے سوال کیا کہ پیٹرولیم لیوی اور دیگر ٹیکسوں کا جنگ سے کیا تعلق ہے؟ ان کا کہنا تھا کہ حکومت پیٹرولیم لیوی کی مد میں سالانہ بڑی رقم وصول کر رہی ہے، جس کا بوجھ عام شہریوں، مزدوروں اور متوسط طبقے پر ڈالا جا رہا ہے۔

امیر جماعت اسلامی نے پیٹرولیم مصنوعات کی قیمتوں میں اضافے کے خلاف 7 اگست کو ملک بھر میں احتجاج اور اہم شاہراہیں بند کرنے کا اعلان کرتے ہوئے کہا کہ احتجاج پرامن ہوگا اور ایمبولینسز کو راستہ دیا جائے گا۔

انہوں نے کہا کہ اگر حکومت نے احتجاج روکنے کی کوشش کی تو صورتحال حکومت مخالف تحریک کی طرف بڑھ سکتی ہے، جبکہ احتجاج میں تاجروں، صنعتکاروں، وکلا، طلبہ اور دیگر طبقات کو شامل کیا جائے گا۔

حافظ نعیم الرحمن نے بجلی بحران، آئی پی پیز معاہدوں اور بلوچستان کی صورتحال پر بھی اظہار تشویش کرتے ہوئے کہا کہ مسائل کا حل مذاکرات اور تمام اسٹیک ہولڈرز کی مشاورت سے نکالا جانا چاہیے۔