سوشل میڈیا کا بے لگام استعمال نوجوان نسل کی اخلاقی تباہی کا سبب بن رہا ہے، مفتی اکرام اللہ واحدی

کراچی ( ) اتحاد المدارس الاسلامیہ کے ناظم الامتحانات مفتی اکرام اللہ واحدی نے کہا ہے کہ سوشل میڈیا کا بے لگام استعمال نوجوان نسل کی اخلاقی بنیادوں کو کھوکھلا کر رہا ہے۔ بے مقصد، فحش اور غیر اخلاقی مواد نہ صرف نوجوانوں کی سوچ کو مسخ کر رہا ہے بلکہ پورے معاشرے کے لیے ایک ناسور بنتا جا رہا ہے۔

انہوں نے کراچی میں گھریلو تنازع پر ایک بزرگ کی جانب سے اہلیہ کے قتل کے واقعے کی سوشل میڈیا پر غیر ضروری تشہیر کو شدید تنقید کا نشانہ بناتے ہوئے کہا کہ ایسے حساس واقعات کو سنسنی خیزی کے انداز میں پیش کرنا معاشرتی بگاڑ اور اخلاقی گراوٹ کو مزید بڑھاتا ہے۔ میڈیا اور سوشل پلیٹ فارمز کو ذمہ داری کا مظاہرہ کرنا ہوگا۔

مفتی اکرام اللہ واحدی نے کہا کہ تحقیقاتی اداروں اور متعلقہ اہلکاروں کی تربیت وقت کی اہم ضرورت ہے تاکہ وہ اس بات کا تعین کر سکیں کہ کون سی معلومات عوام تک پہنچانا مفید ہے اور کون سی نقصان دہ۔

انہوں نے مزید کہا کہ اسلام میں جرم کی نہیں بلکہ سزا کی تشہیر کی اجازت ہے تاکہ معاشرے میں عبرت قائم ہو اور لوگ برائی سے بچیں۔ ہمیں اپنی نئی نسل کو مثبت اور تعمیری راستہ دینے کے لیے مشترکہ کوششیں کرنا ہوں گی۔

جاری کردہ شعبہ نشرو اشاعت اتحاد المدارس الاسلامیہ پاکستان