صحت کے شعبے کی بہتری حکومت کی اولین ترجیح ہے ،بخت محمد کاکڑ

صوبائی وزیر صحت بخت محمد کاکڑ نے کہا ہے کہ صوبے میں صحت کے شعبے کی بہتری حکومت کی اولین ترجیحات میں شامل ہے اور عوام کو معیاری طبی سہولیات کی فراہمی کے لیے جامع اقدامات کیے جا رہے ہیں دور دراز علاقوں تک صحت کی سہولیات پہنچانے کے لیے خصوصی حکمت عملی تیار کی گئی ہے۔اپنے ایک بیان میں بخت محمد کاکڑ نے کہا کہ بلوچستان کے ہسپتالوں میں جدید طبی آلات کی فراہمی اور ڈاکٹروں کی کمی کو پورا کرنے کے لیے اقدامات تیز کر دیے گئے ہیں۔ انہوں نے کہا کہ دیہی علاقوں میں بنیادی مراکز صحت کو فعال بنانے اور وہاں ادویات کی مسلسل دستیابی کو یقینی بنایا جا رہا ہے تاکہ عوام کو اپنے علاقوں میں ہی علاج کی سہولت میسر آ سکے۔انہوں نے مزید کہا کہ صوبے میں ماں اور بچے کی صحت کے پروگرامز کو بھی وسعت دی جا رہی ہے، جبکہ ایمرجنسی سروسز کو بہتر بنانے کے لیے نئے اقدامات اٹھائے جا رہے ہیں۔ “ہم چاہتے ہیں کہ ہر شہری کو بروقت اور معیاری علاج کی سہولت فراہم ہو،” انہوں نے زور دے کر کہا۔وزیر صحت نے بتایا کہ حکومت نجی شعبے کے ساتھ بھی تعاون بڑھا رہی ہے تاکہ صحت کے نظام کو مزید مو¿ثر بنایا جا سکے۔ انہوں نے کہا کہ میڈیکل اسٹاف کی تربیت اور استعداد کار بڑھانے کے لیے بھی خصوصی پروگرامز شروع کیے جا رہے ہیں۔بخت محمد کاکڑ نے کہا کہ کورونا سمیت دیگر وبائی امراض سے نمٹنے کے لیے بھی حکومت مکمل طور پر تیار ہے اور اس حوالے سے ہسپتالوں میں ضروری سہولیات کو مزید بہتر بنایا جا رہا ہے۔ انہوں نے کہا کہ صحت مند معاشرہ ہی ترقی کی بنیاد ہوتا ہے اور حکومت بلوچستان اس مقصد کے حصول کے لیے ہر ممکن اقدامات جاری رکھے گی تاکہ عوام کو بہتر اور معیاری طبی سہولیات فراہم کی جا سکیں