اخبار پڑھنے سے طلبہ کی معلومات میں اضافہ ہوتا ہے اور ان میں تنقیدی سوچ پروان چڑھتی ہے، غلام محمد نوندانی

میرواہ گورچانی(نمائندہ خصوصی) گلوبل ٹائمز میڈیا یورپ کے مطابق سندھ ایجوکیشن فاؤنڈیشن کے اشتراک سے چلنے والے معروف تعلیمی ادارے فاس دی ہوپ اسکول اینڈ کالج میرواہ گورچانی کی جانب سے طلبہ کو اخبارات کی اہمیت سے روشناس کرانے کے لیے ایک قابلِ تحسین اقدام کیا گیا ہے۔ اسکول انتظامیہ نے نوٹس بورڈ پر روزانہ مختلف قومی اخبارات آویزاں کرنے کا سلسلہ شروع کر دیا ہے جس کے نتیجے میں طلبہ میں خبریں پڑھنے کا رجحان نمایاں طور پر بڑھ گیا ہے۔تفصیلات کے مطابق اس اقدام کا مقصد نئی نسل کو قومی و عالمی حالات سے باخبر رکھنا اور ان میں مطالعے کی عادت کو فروغ دینا ہے۔نوٹس بورڈ کے سامنے طلبہ کی بڑی تعداد جمع ہو کر خبریں پڑھتی اور آپس میں تبادلہ خیال کرتی نظر آتی ہے جو ان کی بڑھتی ہوئی دلچسپی کا واضح ثبوت ہے۔ گیارہویں جماعت کے طالب علم حسیب اللہ اسد نے بتایا کہ انہیں کھیلوں کے صفحات خاص طور پر پسند ہیں-جبکہ طالب علم ونود نے تجارتی و صنعتی خبروں میں دلچسپی ظاہر کی۔اس حوالے سے استاد عبدالحمید کمبھار کا کہنا تھا کہ جدید دور میں موبائل اور انٹرنیٹ کے بڑھتے استعمال کے باعث اخبار بینی کا رجحان کم ہو چکا ہے ایسے میں اسکول انتظامیہ کا یہ اقدام نہایت اہم اور قابلِ ستائش ہے۔ادارے کے پرنسپل غلام محمد نوندانی نے کہا کہ اخبار پڑھنے سے طلبہ کی معلومات میں اضافہ ہوتا ہے اور ان میں تنقیدی سوچ پروان چڑھتی ہے جو موجودہ دور کی اہم ضرورت ہے۔انہوں نے امید ظاہر کی کہ دیگر تعلیمی ادارے بھی اس طرز کے اقدامات اپنائیں گے تاکہ نئی نسل کو باشعور اور باخبر بنایا جا سکے۔