روہڑی کے قریب ایل پی جی باؤزر دھماکے کا واقعہ، چیئرمین ڈسٹرکٹ کونسل، ڈپٹی کمشنر اور ایس ایس پی سکھر کا جائے حادثہ کا دورہ، 2 افراد جاں بحق، 4 زخمی

سکھر (رپورٹ: اسلم سومرو) روہڑی کے قریب نیشنل ہائی وے پر موٹروے انٹرچینج کے نزدیک ایل پی جی باؤزر میں ہونے والے خوفناک دھماکے کے بعد چیئرمین ڈسٹرکٹ کونسل سکھر سید کمیل حیدر شاہ نے ڈپٹی کمشنر سکھر نادر خان شہزاد اور ایس ایس پی سکھر احمد چوہدری کے ہمراہ جائے حادثہ کا دورہ کیا۔ حکام کے مطابق حادثے میں 2 افراد جاں بحق جبکہ 4 افراد زخمی ہوئے ہیں اس موقع پر سید کمیل حیدر شاہ نے قیمتی انسانی جانوں کے ضیاع پر گہرے دکھ اور افسوس کا اظہار کرتے ہوئے کہا کہ زخمیوں کو بہترین طبی سہولیات فراہم کی جا رہی ہیں۔ ضرورت پڑنے پر زخمیوں کو نجی اسپتال یا ایئر ایمبولینس کے ذریعے دوسرے شہر منتقل کیا جائے گا تاکہ انہیں بروقت اور بہتر علاج کی سہولت میسر آسکے انہوں نے مزید کہا کہ نیشنل ہائی وے اور موٹروے انٹرچینج کے قریب ریسکیو 1122 کے مراکز قائم کیے جائیں گے، تاکہ مستقبل میں کسی بھی ہنگامی صورتحال سے فوری طور پر نمٹا جا سکے۔ ان کا کہنا تھا کہ ایل پی جی باؤزر کہاں سے آیا، اس حوالے سے معلومات حاصل کی جا رہی ہیں ڈپٹی کمشنر سکھر نادر خان شہزاد نے کہا کہ حادثے کی وجوہات معلوم کرنے کے لیے تحقیقات جاری ہیں اور انتظامیہ کی اولین ترجیح زخمیوں کو بہترین طبی سہولیات فراہم کرنا ہے۔ انہوں نے بتایا کہ جاں بحق ہونے والے دونوں افراد ایل پی جی باؤزر کے ڈرائیور تھے، جبکہ حادثے میں دیگر گاڑیوں کے ڈرائیور بھی زخمی ہوئے ہیں ایس ایس پی سکھر احمد چوہدری کے مطابق حادثے کے بعد متاثرہ شاہراہ پر ٹریفک بحال کر دی گئی ہے۔ انہوں نے بتایا کہ واقعے کی وجوہات معلوم کرنے کے لیے محکمہ انسدادِ دہشت گردی (سی ٹی ڈی) کی ٹیم نے جائے وقوعہ سے شواہد اکٹھے کر لیے ہیں، جن کی روشنی میں مزید تحقیقات کی جا رہی ہیں حکام کا کہنا ہے کہ حادثے کی وجوہات اور ایل پی جی باؤزر کی آمد و رفت سے متعلق حقائق تحقیقات مکمل ہونے کے بعد سامنے آئیں گے۔