سولر انرجی پر جانا بہتر ہے لیکن کیا کریں ہاتھ بندھے ہوئے ہیں، خواجہ آصف

اسلام آباد (ویب ڈیسک): وزیر دفاع خواجہ آصف نے کہا ہے کہ ملک میں سولر انرجی کی جانب جانا بہتر راستہ ہے، تاہم موجودہ حالات میں حکومت کو مختلف مجبوریوں کا سامنا ہے۔ انہوں نے کہا کہ سولر صارفین اور دیگر بجلی صارفین کے درمیان توازن برقرار رکھنا ضروری ہے، جبکہ کیپسٹی ادائیگیوں کے باعث حکومت کے ہاتھ بندھے ہوئے ہیں۔

قومی اسمبلی کا اجلاس اسپیکر سردار ایاز صادق کی زیر صدارت ہوا، جس میں سولر پینلز پر ٹیکس کے نفاذ کے خلاف توجہ دلاؤ نوٹس زیر بحث آیا۔ یہ نوٹس پیپلز پارٹی کے رکن سید نوید قمر نے پیش کیا۔

وزیر مملکت برائے خزانہ ڈاکٹر شذرہ منصب علی کھرل نے حکومتی مؤقف پیش کرتے ہوئے بتایا کہ سولر پر ٹیکس 18 فیصد کے بجائے کم کر کے 10 فیصد کر دیا گیا ہے، اور نئی پالیسی کا اطلاق صرف نئے صارفین پر ہوگا۔ انہوں نے کہا کہ سولر ٹیکس کے نفاذ کے پیچھے کئی معاشی وجوہات کارفرما ہیں۔

اس موقع پر سید نوید قمر نے سوال اٹھایا کہ جب بجلی مہنگے اور ماحولیاتی آلودگی پھیلانے والے ذرائع سے پیدا ہو رہی ہے تو پھر گرین انرجی کی حوصلہ شکنی کیوں کی جا رہی ہے؟ انہوں نے اسے ممکنہ طور پر اینٹی سولر پالیسی قرار دیا۔