صحت ہر شہری کا بنیادی حق ہے، وزیر اعلیٰ بلوچستان

عالمی یوم صحت کے موقع پر وزیر اعلیٰ بلوچستان میر سرفراز بگٹی نے اپنے پیغام میں کہا ہے کہ صحت ہر انسان کا بنیادی حق ہے اور ایک صحت مند معاشرہ ہی ترقی کی مضبوط بنیاد فراہم کرتا ہے۔

انہوں نے کہا کہ عالمی یوم صحت منانے کا مقصد عوام میں صحت کے حوالے سے آگاہی پیدا کرنا اور معیاری طبی سہولیات کی اہمیت کو اجاگر کرنا ہے۔ حکومت بلوچستان صحت کے شعبے کی بہتری کے لیے عملی اقدامات کر رہی ہے اور صوبے کے دور دراز علاقوں تک طبی سہولیات کی فراہمی یقینی بنائی جا رہی ہے۔

وزیر اعلیٰ کا کہنا تھا کہ مؤثر مانیٹرنگ اور اصلاحات کے باعث ہسپتالوں میں طبی عملے کی غیر حاضری میں نمایاں کمی آئی ہے جو اب ایک فیصد سے بھی کم ہو چکی ہے۔ انہوں نے مزید کہا کہ ہسپتالوں کی اپ گریڈیشن، جدید طبی سہولیات کی فراہمی اور عملے کی حاضری یقینی بنانے کے لیے مؤثر نظام متعارف کرایا گیا ہے۔

میر سرفراز بگٹی نے اس عزم کا اعادہ کیا کہ ہر شہری کو اس کی دہلیز پر معیاری علاج کی سہولت فراہم کرنا حکومت کا وژن ہے، اور صحت کے شعبے میں بہتری کے لیے اقدامات کا سلسلہ جاری رکھا جائے گا۔