کوئٹہ میں دہشتگردی کی دو کوششیں ناکام، 5 شہری زخمی

کوئٹہ: شہر میں دو مختلف مقامات پر دہشتگردی کی کوششیں قانون نافذ کرنے والے اداروں نے بروقت کارروائی کرتے ہوئے ناکام بنا دیں۔

معاون برائے داخلہ حکومت بلوچستان بابر یوسفزئی کے مطابق دہشتگردوں کی موجودگی کی اطلاع ملنے پر ایف سی اور پولیس نے فوری اور مؤثر کارروائی کی، جس پر دہشتگرد فرار ہونے لگے۔ فرار کے دوران ملزمان نے معصوم شہریوں پر فائرنگ کی، جس کے نتیجے میں 5 افراد معمولی زخمی ہو گئے۔

زخمیوں کو فوری طور پر سول اسپتال کوئٹہ منتقل کر دیا گیا، جہاں انہیں طبی امداد فراہم کی جا رہی ہے۔

بابر یوسفزئی کا کہنا تھا کہ سیکیورٹی فورسز مکمل طور پر الرٹ ہیں اور صوبے بھر میں امن و امان کی صورتحال قابو میں ہے۔ انہوں نے کہا کہ حکومت عوام کی جان و مال کے تحفظ کے لیے تمام ممکنہ اقدامات کر رہی ہے۔

انہوں نے شہریوں اور میڈیا سے اپیل کی کہ غیر مصدقہ اطلاعات سے گریز کریں اور ذمہ دارانہ رویہ اختیار کریں۔