افغانوں کو پاکستانی خاندانوں میں شامل کرکے جعلی شناختی کارڈ بنانے والا گروہ گرفتار

بنوں پولیس نے کامیاب کارروائی کرتے ہوئے افغان مہاجرین کو پاکستانی خاندانوں میں شامل کر کے جعلی شناختی کارڈز بنانے والے گروہ کو گرفتار کر لیا۔

ایکسپریس نیوز کے مطابق یہ کارروائی ڈی پی او بنوں یاسر آفریدی کو ملنے والی مصدقہ اطلاع پر کی گئی، جس پر ایس پی سٹی توحید خان اور ایس ایچ او سٹی ریاض خان نے پولیس ٹیم کے ہمراہ چھاپہ مار کر 3 ملزمان کو رنگے ہاتھوں گرفتار کر لیا۔

گرفتار ملزمان میں اجمل ولد عبدالرزاق اور بادشاہ خان ولد لاہور خان شامل ہیں، جبکہ ان کے ساتھ افغان شہری نقیب شاہ ولد زرکلام شاہ بھی پکڑا گیا۔

پولیس کے مطابق گرفتار افغان شہری کا تعلق صوبہ خوست سے ہے، جو چمن بارڈر کے راستے غیر قانونی طور پر پاکستان میں داخل ہو کر بنوں پہنچا۔

ابتدائی تفتیش میں انکشاف ہوا کہ افغان شہری کے والد نے گروہ کے مفرور ارکان مامور (سکنہ کوئٹہ) اور زین اللہ (سکنہ میرانشاہ) سے 28 لاکھ روپے کے عوض پاکستانی شناختی کارڈ اور دیگر دستاویزات حاصل کرنے کا معاہدہ کیا تھا۔

ملزمان نے دورانِ تفتیش اعتراف کیا کہ وہ افغان باشندوں کو پاکستانی خاندانوں میں شامل کرواتے تھے، جس کے عوض متعلقہ خاندان کو فی کس 2 لاکھ روپے معاوضہ دیا جاتا تھا۔

پولیس کے مطابق ملزمان سے مزید تفتیش جاری ہے جبکہ گروہ کے دیگر مفرور افراد کی گرفتاری کے لیے چھاپے مارے جا رہے ہیں۔

ڈی پی او بنوں یاسر آفریدی کا کہنا ہے کہ ملکی سلامتی اور عوام کے تحفظ کے لیے ایسے عناصر کے خلاف سخت کارروائی جاری رہے گی اور ملوث افراد کو قانون کے کٹہرے میں لایا جائے گا۔

افغانوں کو پاکستانی خاندانوں میں شامل کرکے جعلی شناختی کارڈ بنانے والا گروہ گرفتار