پاکستان نے شنگھائی تعاون تنظیم کے انٹربینک کنسورشیم کی چیئرمین شپ سنبھال لی

اسلام آباد: پاکستان نے شنگھائی تعاون تنظیم (ایس سی او) کے انٹربینک کنسورشیم کی چیئرمین شپ 2026-2027 کے لیے سنبھال لی ہے۔ وزارت خزانہ کے مطابق سلطان علی آلانہ نے کنسورشیم کے چیئرمین کی ذمہ داریاں سنبھال لی ہیں۔

پاکستان کی ایس سی او اور اس کے انٹربینک کنسورشیم کی چیئرمین شپ ایک ہی مدت کے لیے ہوگی۔ اس پیشرفت کو علاقائی تجارت، سرمایہ کاری اور مالیاتی روابط کے فروغ میں پاکستان کے بڑھتے ہوئے کردار کی عکاسی قرار دیا گیا ہے۔

وزارت خزانہ نے سلطان علی آلانہ کو چیئرمین شپ سنبھالنے پر مبارکباد دی ہے۔ اس موقع پر پاکستان نے ایس سی او کے رکن ممالک کے درمیان اقتصادی شراکت داری مضبوط بنانے کے عزم کا اعادہ بھی کیا۔

پاکستان سرحد پار تجارت اور سرمایہ کاری میں سہولت فراہم کرنے کے لیے پرعزم ہے، جبکہ علاقائی اقتصادی انضمام اور مشترکہ خوشحالی کا فروغ بھی ملکی ترجیحات میں شامل ہے۔