ٹرائی نیشن سیریز: پاکستان پر فائنل میں سلو اوور ریٹ پر جرمانہ عائد

لاہور: انٹرنیشنل کرکٹ کونسل (آئی سی سی) نے ٹرائی نیشن سیریز کے فائنل میں سلو اوور ریٹ کے باعث پاکستان کرکٹ ٹیم پر میچ فیس کا 5 فیصد جرمانہ عائد کردیا ہے۔

آئی سی سی کے مطابق ہفتے کو لاہور میں پاکستان اور سری لنکا کے درمیان کھیلے گئے فائنل میں قومی ٹیم مقررہ وقت میں ایک اوور مکمل نہ کرسکی، جس پر میچ ریفری جیف کرو نے پاکستان کا اوور ریٹ کم قرار دیا۔

پاکستان پر آئی سی سی کوڈ آف کنڈکٹ کے آرٹیکل 2.22 کے تحت جرمانہ عائد کیا گیا ہے۔ اس ضابطے کے مطابق مقررہ وقت میں ہر اوور کم ہونے پر کھلاڑیوں کی میچ فیس کا 5 فیصد جرمانہ کیا جاتا ہے۔

قومی ٹیم کے کپتان شاہین آفریدی نے سلو اوور ریٹ کی غلطی تسلیم کرتے ہوئے جرمانہ قبول کرلیا۔

واضح رہے کہ فائنل میں پاکستان نے سری لنکا کا 326 رنز کا ہدف 7 وکٹوں کے نقصان پر 9 گیندیں قبل حاصل کرکے ٹرائی نیشن سیریز اپنے نام کی تھی۔ فخر زمان نے 99 گیندوں پر 127 رنز کی شاندار اننگز کھیلی، جس میں 11 چوکے اور 6 چھکے شامل تھے۔ یہ ان کے ون ڈے کیریئر کی 12ویں سنچری تھی۔