ایران کا میزائل حملوں میں 500 امریکی فوجی ہلاک کرنے اور ایک ایف-16 طیارہ تباہ کرنے کا دعویٰ

ایرانی پاسداران انقلاب نے دعویٰ کیا ہے کہ حالیہ حملوں میں 500 امریکی فوجی ہلاک یا زخمی ہوئے، جبکہ جنوبی فارس کے علاقے میں ایک امریکی ایف-16 طیارے کو بھی نشانہ بنایا گیا۔

ایرانی حکام کے مطابق مذکورہ طیارہ سعودی عرب کے ایک ایئربیس تک پہنچنے سے قبل ہی گر کر تباہ ہو گیا، تاہم اس دعوے کی آزاد ذرائع سے تصدیق نہیں ہو سکی۔

ایرانی بیان میں کہا گیا ہے کہ ان حملوں کے دوران مقبوضہ فلسطین سمیت خطے میں امریکی اور اسرائیلی صنعتی مراکز کو نشانہ بنایا گیا۔ ختم الانبیاء ہیڈکوارٹر نے دعویٰ کیا کہ اسرائیلی شہر حیفا میں ایک اہم الیکٹرانک وارفیئر سینٹر کو نشانہ بنایا گیا، جبکہ بن گوریون ایئرپورٹ کے قریب ایندھن کے ذخائر پر بھی حملہ کیا گیا۔

ایرانی فوجی قیادت نے خبردار کیا ہے کہ اگر ایرانی صنعتی تنصیبات پر مزید حملے کیے گئے تو اس کے سنگین نتائج برآمد ہوں گے۔

دفاعی ماہرین کے مطابق اس نوعیت کے بیانات خطے میں بڑھتی ہوئی کشیدگی اور ممکنہ بڑے تصادم کی نشاندہی کرتے ہیں، تاہم کئی دعوؤں کی آزادانہ تصدیق ابھی تک سامنے نہیں آ سکی۔