خطے کی کشیدہ صورتحال: پاکستان اور مصر کے درمیان اعلیٰ سطحی سفارتی مشاورت

مصری وزیر خارجہ ڈاکٹر بدر عبدالعاطی اسلام آباد پہنچ گئے، جہاں نائب وزیراعظم و وزیر خارجہ اسحاق ڈار نے دفتر خارجہ میں ان کا استقبال کیا۔

ملاقات کے دوران پاکستان اور مصر کے درمیان خطے کی موجودہ صورتحال، دوطرفہ تعلقات اور باہمی دلچسپی کے امور پر تفصیلی مشاورت کی جائے گی، جبکہ تعلقات کو مزید مضبوط بنانے پر بھی تبادلہ خیال متوقع ہے۔

ذرائع کے مطابق مشرق وسطیٰ کی کشیدہ صورتحال اور ایران جنگ بندی کے تناظر میں پاکستان کی میزبانی میں 29 اور 30 مارچ کو چار فریقی وزرائے خارجہ کا اہم اجلاس منعقد ہوگا، جس میں مصر، ترکیہ اور سعودی عرب کے وزرائے خارجہ شرکت کریں گے۔

اجلاس میں خطے کی سیکیورٹی صورتحال، مشرق وسطیٰ کی کشیدگی، علاقائی استحکام اور باہمی تعاون کے امور پر تفصیلی غور کیا جائے گا، جبکہ امن کے فروغ کے لیے مشترکہ حکمت عملی پر بھی بات چیت متوقع ہے۔

سفارتی حلقوں کے مطابق یہ اجلاس موجودہ علاقائی تناؤ کے تناظر میں نہایت اہمیت کا حامل ہے اور اس سے خطے میں امن و استحکام کے لیے مثبت پیش رفت کی امید ہے۔