ایندھن کی مارچ کی ضروریات مکمل، اپریل کیلئے بھی منصوبہ بندی کرلی ہے: وزیر خزانہ

وفاقی وزیر خزانہ محمد اورنگزیب نے کہا ہے کہ ملک میں ایندھن کی دستیابی کی صورتحال تسلی بخش ہے اور گھبراہٹ میں خریداری یا ذخیرہ اندوزی کی کوئی ضرورت نہیں۔

وزیر خزانہ کی زیر صدارت پیٹرولیم مصنوعات کی نگرانی سے متعلق قائم کابینہ کمیٹی کا اجلاس ہوا، جس میں بریفنگ دی گئی کہ مارچ کے لیے ایندھن کی تمام ضروریات مکمل طور پر پوری کر لی گئی ہیں جبکہ اپریل کے لیے بھی پیشگی منصوبہ بندی کر لی گئی ہے۔

اجلاس میں بتایا گیا کہ عالمی منڈی سے مزید سپلائی ذرائع تلاش کیے جا رہے ہیں تاکہ مستقبل میں کسی بھی ممکنہ کمی سے بچا جا سکے۔

دوسری جانب سیکرٹری پیٹرولیم نے خبردار کیا کہ 14 اپریل کے بعد ملک میں ایل این جی کی دستیابی متاثر ہو سکتی ہے، جس کے باعث اپریل میں پاور سیکٹر کی گیس ضروریات پوری کرنا مشکل ہو جائے گا۔