شدید بارشیں اور ممکنہ سیلاب؛ وزیراعظم کی تمام اداروں کو تیار رہنے کی ہدایت

اسلام آباد: وزیراعظم شہباز شریف نے ملک میں شدید بارشوں اور ممکنہ سیلاب کے پیش نظر تمام متعلقہ اداروں کو مکمل تیار رہنے کی ہدایت کردی۔

چیئرمین این ڈی ایم اے لیفٹیننٹ جنرل انعام حیدر ملک نے وزیراعظم سے ملاقات کرکے مون سون کے دوران شدید بارشوں، ممکنہ سیلاب اور پیشگی انتظامات پر تفصیلی بریفنگ دی۔

وزیراعظم نے متاثرہ علاقوں میں عوام کو فوری امداد اور ریلیف فراہم کرنے کے لیے تمام دستیاب وسائل بروئے کار لانے کی ہدایت کی۔ انہوں نے رابطہ سڑکوں اور پلوں پر ٹریفک کی روانی برقرار رکھنے اور امدادی سامان کی بروقت ترسیل کے لیے متعلقہ اداروں کے درمیان رابطے مزید مؤثر بنانے پر زور دیا۔

وزیراعظم شہباز شریف نے این ڈی ایم اے کو صوبائی حکومتوں اور صوبائی ڈیزاسٹر مینجمنٹ اتھارٹیز کے ساتھ قریبی رابطہ رکھنے کی بھی ہدایت کی۔

چیئرمین این ڈی ایم اے نے وزیراعظم کو بتایا کہ ممکنہ ہنگامی موسمی صورتحال سے نمٹنے کے لیے تمام متعلقہ ادارے ریسکیو اور ریلیف سرگرمیوں کے لیے تیار ہیں۔