عقیدہ ختم نبوت کے تحفظ کیلئے جمعیت علماء اسلام سیسہ پلائی دیوار ہے، حافظ حمد اللہ

ٹیکسلا( ) جمعیت علماء اسلام پاکستان کے مرکزی رہنما سینیٹر مولانا حافظ حمد اللہ نے کہا ہے کہ جمعیت علماء اسلام عقیدۂ ختمِ نبوت کے تحفظ اور آئین و قانون کی بالادستی کے لیے سیسہ پلائی ہوئی دیوار کی طرح کھڑی ہے، ختمِ نبوت کانفرنس سے خطاب کرتے ہوئے انہوں نے کہا کہ اسلام امن و سلامتی کا دین ہے اور آئین پاکستان کی روح بھی امن، استحکام اور مذہبی ہم آہنگی کی عکاسی کرتی ہے، آئین پاکستان کے مطابق قادیانیوں کو غیر مسلم قرار دیا گیا ہے، لہٰذا اس معاملے کو آئین و قانون کے دائرے میں رہتے ہوئے دیکھا اور حل کیا جانا چاہیے، انہوں نے کہا کہ کسی بھی فتنے کو پروان چڑھانے یا آئینی و قانونی حدود سے تجاوز کرنے کی کوشش معاشرے میں اشتعال اور بے چینی کا باعث بن سکتی ہے، حکمران آئین و قانون سے روگردانی سے گریز کریں اور ملک کے امن و استحکام کو مقدم رکھیں، مولانا حافظ حمد اللہ نے کہا کہ عقیدۂ ختمِ نبوت مسلمانوں کے ایمان کا بنیادی حصہ ہے اور جمعیت علماء اسلام اس عقیدے کے تحفظ کے لیے اپنی آئینی، جمہوری اور پرامن جدوجہد جاری رکھے گی، انہوں نے شرکاء پر زور دیا کہ وہ اتحاد، امن اور آئینی و قانونی جدوجہد کے ساتھ جمعیت علماء اسلام کو مزید مضبوط بنانے کے لیے اپنا کردار ادا کریں۔