ڈپٹی کمشنر کوئٹہ مہراللہ بادینی نے بچی کو پولیو سے بچاؤ کے قطرے پلا کر انسدادِ پولیو مہم کا افتتاح کردیا

کوئٹہ: ڈپٹی کمشنر کوئٹہ مہراللہ بادینی نے بچی کو حفاظتی قطرے پلا کر 2 نومبر سے شروع ہونے والی انسدادِ پولیو مہم کا باقاعدہ افتتاح کردیا۔

اس موقع پر میڈیا سے گفتگو کرتے ہوئے ڈپٹی کمشنر نے والدین، علماء کرام، قبائلی عمائدین، اساتذہ، سیاسی و سماجی رہنماؤں اور معاشرے کے تمام طبقات سے اپیل کی کہ وہ پولیو کے مکمل خاتمے کے لیے اپنا کردار ادا کریں اور مہم کی کامیابی کے لیے ضلعی انتظامیہ اور محکمہ صحت سے تعاون کریں۔

مہراللہ بادینی نے کہا کہ پولیو ایک خطرناک بیماری ہے جو بچوں کو عمر بھر کی معذوری سے دوچار کرسکتی ہے۔ اس سے بچاؤ کا مؤثر طریقہ بروقت ویکسین کے قطرے پلانا ہے۔ والدین اپنے پانچ سال سے کم عمر تمام بچوں کو ہر مہم کے دوران پولیو سے بچاؤ کے قطرے لازمی پلوائیں، چاہے انہیں پہلے کئی مرتبہ ویکسین کیوں نہ دی جا چکی ہو۔

انہوں نے والدین پر زور دیا کہ وہ گھروں میں آنے والی پولیو ٹیموں کے ساتھ تعاون کریں اور اس بات کو یقینی بنائیں کہ کوئی بچہ حفاظتی قطروں سے محروم نہ رہے۔

ڈپٹی کمشنر نے کہا کہ پولیو کا خاتمہ صرف حکومت یا محکمہ صحت کی ذمہ داری نہیں بلکہ اس کے لیے معاشرے کے تمام طبقات کی مشترکہ کوششیں ضروری ہیں۔ علماء کرام مساجد اور مدارس میں پولیو ویکسین کی اہمیت کے حوالے سے آگاہی پیدا کریں، جبکہ قبائلی عمائدین، اساتذہ، سیاسی و سماجی رہنما اور میڈیا بھی والدین کا اعتماد بڑھانے میں اپنا کردار ادا کریں۔

انہوں نے کہا کہ پولیو ورکرز گھر گھر جا کر بچوں کو حفاظتی قطرے پلانے کی قومی ذمہ داری انجام دیتے ہیں، اس لیے ان کی حوصلہ افزائی اور ان کے ساتھ تعاون ہم سب کا فرض ہے۔

مہراللہ بادینی نے اس عزم کا اظہار کیا کہ بچوں کو پولیو سے محفوظ رکھنے اور کوئٹہ سمیت ملک کو پولیو سے پاک بنانے کے لیے تمام دستیاب وسائل بروئے کار لائے جائیں گے۔ انہوں نے شہریوں سے اپیل کی کہ 2 نومبر سے شروع ہونے والی مہم میں بھرپور تعاون کریں تاکہ کوئی بچہ پولیو سے بچاؤ کے قطروں سے محروم نہ رہے۔