کوئٹہ میں کوئی بچہ پولیو کے قطرے پینے سے محروم نہ رہے، مہراللہ بادینی

کوئٹہ: ڈپٹی کمشنر کوئٹہ مہراللہ بادینی کی زیر صدارت 2 نومبر سے شروع ہونے والی انسدادِ پولیو مہم کی تیاریوں اور انتظامات کا جائزہ لینے کے لیے اجلاس منعقد ہوا، جس میں ڈسٹرکٹ ہیلتھ آفیسر، نیشنل ای او سی، ڈسٹرکٹ کوآرڈینیٹر اور دیگر متعلقہ حکام نے شرکت کی۔

اجلاس میں مہم کے اہداف، سکیورٹی انتظامات، مائیکرو پلان، پولیو ٹیموں کی تعیناتی اور مؤثر نگرانی سے متعلق تفصیلی بریفنگ دی گئی۔

حکام نے بتایا کہ مہم کے دوران کوئٹہ میں مجموعی طور پر 4 لاکھ 29 ہزار بچوں کو پولیو سے بچاؤ کے قطرے پلانے کا ہدف مقرر کیا گیا ہے، جس کے لیے 1600 پولیو ٹیمیں تشکیل دی گئی ہیں، جبکہ ٹیموں کی سکیورٹی کے لیے 1800 اہلکار تعینات کیے جائیں گے۔

ڈپٹی کمشنر مہراللہ بادینی نے ہدایت کی کہ سکیورٹی اور مہم کے پلان پر مؤثر عملدرآمد یقینی بنایا جائے، تمام علاقوں کے مائیکرو پلان کا باریک بینی سے جائزہ لیا جائے اور پولیو ٹیموں کی باقاعدہ نگرانی کی جائے۔

انہوں نے مزید ہدایت کی کہ پولیو سے انکاری والدین کے بچوں تک بھی رسائی یقینی بنائی جائے اور کسی بھی علاقے یا بچے کو پولیو سے بچاؤ کے قطرے پلانے سے محروم نہ رکھا جائے۔

ڈپٹی کمشنر نے متعلقہ حکام پر زور دیا کہ تمام ادارے باہمی رابطے اور مربوط حکمت عملی کے تحت اپنی ذمہ داریاں ادا کریں تاکہ انسدادِ پولیو مہم کو کامیاب بنایا جا سکے۔