مری؛ شادی سے واپسی پر گاڑی گہری کھائی میں جا گری، ایک ہی خاندان کے 7 افراد جاں بحق

مری: بڑوھا لنک روڈ پر شادی کی تقریب سے واپس آنے والی گاڑی گہری کھائی میں جاگری، جس کے نتیجے میں ایک ہی خاندان کے 7 افراد جاں بحق ہوگئے۔

ریسکیو ذرائع کے مطابق گاڑی میں 14 افراد سوار تھے، جو قریبی گاؤں میں شادی کی تقریب میں شرکت کے بعد گھر واپس جا رہے تھے۔ حادثے کے بعد گاڑی میں آگ بھڑک اٹھی، جس کے باعث سات افراد موقع پر ہی جاں بحق ہوگئے۔

جاں بحق ہونے والوں میں ارشد، نگہت، لائبہ، طیب محمود، رائمہ نور، کاشان اور ڈیڑھ سالہ آئمہ نور شامل ہیں۔ جاں بحق افراد میں بچے اور خواتین بھی شامل ہیں۔ لاشوں کو ضروری کارروائی کے لیے ہولی فیملی اسپتال راولپنڈی منتقل کر دیا گیا۔

واضح رہے کہ گزشتہ روز بھی مظفرآباد کے نواحی علاقے شکر پٹیاں میں ایک مسافر جیپ گہری کھائی میں گرنے سے 7 افراد جاں بحق ہوگئے تھے۔