کراچی؛ حساس مقامات کو نشانہ بنانے کی منصوبہ بندی کرنے والا فتنۃ الہندوستان کا دہشتگرد گرفتار

کراچی (اسٹاف رپورٹر) کاؤنٹر ٹیررازم ڈیپارٹمنٹ (سی ٹی ڈی) کراچی اور وفاقی حساس ادارے نے مشترکہ کارروائی کرتے ہوئے کالعدم تنظیم فتنۃ الہندوستان (بی آر جی) سے تعلق کے الزام میں ایک شخص کو گرفتار کرلیا، جس کے قبضے سے دستی بم بھی برآمد ہوا ہے۔

سی ٹی ڈی کے مطابق گرفتار ملزم کی شناخت فضل حق خان ولد کمین کے نام سے ہوئی ہے۔ حکام کا کہنا ہے کہ ملزم مبینہ طور پر غیر ملکی ہینڈلر کی ہدایات پر کراچی کے حساس مقامات اور قانون نافذ کرنے والے اداروں کے دفاتر کو نشانہ بنانے کی منصوبہ بندی کررہا تھا۔

حکام کے مطابق گرفتار شخص پڑوسی ملک سے دہشت گردی کی تربیت حاصل کرچکا ہے۔ ملزم کے دیگر ساتھیوں، سہولت کاروں اور مالی معاونین کی نشاندہی اور گرفتاری کے لیے تحقیقات جاری ہیں۔

سی ٹی ڈی آپریشن کراچی میں ملزم کے خلاف مقدمہ نمبر 94/2026، ایکسپلوسیو سبسٹینسز ایکٹ 1908 کی دفعات 4 اور 5 اور انسدادِ دہشت گردی ایکٹ 1997 کی دفعہ 7 کے تحت درج کرکے قانونی کارروائی شروع کردی گئی ہے۔

کارروائی میں حصہ لینے والی ٹیم کی خدمات کو سراہتے ہوئے اعلیٰ حکام نے اہلکاروں کے لیے تعریفی اسناد اور نقد انعامات دینے کا اعلان کیا ہے۔