محمد یحییٰ اخونزادہ کی خیبرپختونخوا حکومت میں تعیناتی کا نوٹیفکیشن جاری

اسلام آباد: حکومتِ پاکستان نے پاکستان ایڈمنسٹریٹو سروس کے گریڈ 20 کے افسر محمد یحییٰ اخونزادہ کی خدمات خیبرپختونخوا حکومت کے سپرد کرنے کا نوٹیفکیشن جاری کردیا ہے۔

نوٹیفکیشن کے مطابق محمد یحییٰ اخونزادہ اس سے قبل وزیراعظم آفس میں ایڈیشنل سیکریٹری کے طور پر خدمات انجام دے رہے تھے۔ ان کا تعلق خیبرپختونخوا کے ضلع چارسدہ سے ہے۔

محمد یحییٰ اخونزادہ مختلف اہم انتظامی عہدوں پر تعینات رہ چکے ہیں۔ وہ جنوبی اور شمالی وزیرستان میں ایڈیشنل پولیٹیکل ایجنٹ کے علاوہ خیبرپختونخوا کے محکموں صحت، اطلاعات اور تعلیم کے سیکریٹری بھی رہ چکے ہیں۔ اس کے علاوہ انہوں نے کمشنر ڈیرہ اسماعیل خان کی حیثیت سے بھی خدمات انجام دی ہیں۔

نوٹیفکیشن کے مطابق ان کی خدمات سول سرونٹس ایکٹ 1973 کے سیکشن 10 کے تحت خیبرپختونخوا حکومت کے سپرد کی گئی ہیں۔ یہ تعیناتی تاحکمِ ثانی مؤثر رہے گی۔